ރޯދަމަހުގެ މެންދުރުގެ ހޫނުގައި ރައީސް ހިންގެވި ހިންގެވުމަކީ މިކާމިޔާބީގެ އެއް ސިއްރު: ޝިޔާމް

މިނިސްޓަރ ޝިޔާމް

ނިމިދިޔަ ރައްޔިތުންގެ މަޖިލީހުގެ އިންތިޚާބުގައި ޕީއެންސީން ހޯދި ކާމިޔާބުގެ އެއް ސިއްރަކީ ރަމަޟާންމަހުގެ މެންދުރުގެ ގަދަ ހޫނުގައި ރައީސް ޑރ. މުޙައްމަދު މުޢިއްޒު ދޮރުންދޮރަށް ހިންގެވި ހިންގެވުން ކަމުގައި ފިޝަރީޒް މިނިސްޓަރ އަހުމަދު ޝިޔާމު ވިދާޅުވެއްޖެއެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ޝިޔާމް ވިދަޅުވީ ފާއިތުވި މަހެއްހާ ދުވަހު ރައީސް އަވަހާރަފުޅުލައްޕަވާފައިވަނީ ރެޔަކު 4 ގަޑިއިރުކަމަށެވެ. އަދި ރަމަޟާންމަހުގެ ދުވާލު މެންދުރު ގަޑީގައި 48 ޑިގްރީސެލްސިއަސްގައި ހުރި ހޫނާއެކު އެމަނިކުފާނު މާލޭސިޓީގެ ގެތަކަށް ދޮރުންދޮރަށް ކެންޕޭނަށް ހިންގެވުމަކީ ޕީއެންސީއަސް ލިބުނު ކާމިޔާބީގެ އެއް ސިއްރު ކަމުގައެވެ.

ފާއިތުވެގެން މިދިޔަ ދޮޅުމަހެއްހާ ދުވަހަކީ މިއަހަރުގެ އެންމެ ހޫނު ދުވަސްތައް ކަމުގައި މޫސުމާބެހޭ ޤައުމީ އިދާރާއިންވެސް ވަނީ ހާމަކޮށްފައެވެ. އިހުސާސުކުރެވޭ ހޫނުމިން 40 ޑިގްރީއިން މަތީގައި ހުރިއިރު, ފާއިތުވީ އަހަރުތަކަށްވުރެ މިއަހަރުގައި ހޫނުގަދަކަން މެޓުން ވަނީ ފާހަގަކޮށްފައެވެ.

ނިމިގެންދިޔަ މަޖިލިސް އިންތިޚާބުގައި ކޮންގްރެސް ކޯލިޝަނުން ވަނީ މަޖިލީހުގެ ސުޕަމެޖޯރިޓީއެއް ހޯދާފައެވެ. އެގޮތުން ޕީއެންސީއަށް 66 ދާއިރާއެއް ކާމިޔާބުކުރެވުނުއިރު ޕީއެންސީގެ ތާއީދާއެކލު އިތުރު 8 ދާއިރާއެއްގެ ގޮނޑި ވަނީ ކާމިޔާބުވެފައެވެ.

ނިމެމުންދާ މަޖިލީހުގައި ސުޕަމެޖޯރިޓީ އޮތް އެމްޑީޕީއަށް ވަނީ މިއިންތިޚާބުގައި ބޮޑު ނާކާމިޔާބަކާއި ކުރިމަތިވެފައެވެ. އެގޮތުން އެމްޑީޕީން 89 ދާއިރާއަކަށް ވާދަކުރިއިރު ކާމިޔާބުކުރެވުނީ އެންމެ 12 ގޮނޑިއެވެ.

މަޖިލިސް