ހުރިހާ ކަމެއް ދަނީ ރޭވި ގޮތަށް، ނަތީޖާ އެބަފެނޭ

ރައީސް ޑރ މުޙައްމަދު މުޢިއްޒު

ހުރިހާ ކަމެއް ދަނީ ކުރަން ރޭވި ގޮތަށް ކަމަށާއި ނަތީޖާ ވެސް ފެންނަމުންދާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ޕީއެންސީގެ ހަރުގެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ މިދިޔަ ސަރުކާރުގެ ދުވަސްވަރު ރާއްޖޭގެ އިގްތިސާދު ވައްޓާލާފައިވާ އަނދަވަޅުގެ ވާހަކަ ވެރިކަމާ ހަވާލުވެވަޑައިގެން އެންމެ ފުރަތަމަ ރައްޔިތުންނާ މުހާތަބު ކުރައްވަމުން ވެސް ދެންނެވި ކަމަށާއި މި އަނދަވަޅުން އަރައިގަތުމަކީ ވަރަށް ބުރަ މަސައްކަތެއް ކަމަށެވެ. ނަމަވެސް ހުރިހާ ކަމެއް ވެސް މިހާރު ދަނީ އެންމެ ފުރަތަމަ ދުވަހު ކަނޑައެޅި އަދި ރޭވި ގޮތަށް ކަމަށް ރައީސް ވިދާޅުވި އެވެ.

"އަޅުގަނޑުމެން އެންމެ ފުރަތަމަ ކަނޑައެޅި ގޮތަށް ކުރަން ނިންމި ގޮތަށް، ކުރަން ރޭވި ގޮތަށް އިރާދަކުރެއްވިއްތީ މަސައްކަތްތައް ދަނީ ކުރެވެމުން. އަދި އިރާދަކުރެެއްވިއްޔާ ނަތީޖާ ވެސް ދަނީ ފެންނަމުން،" ރައީސް ވިދާޅުވި އެވެ.

ރައީސް ވިދާޅުވީ މި ޤައުމަށް ކަތާ ވަރަށް ނުވަތަ މި ޤައުމަށް ހެޔޮވަރު ވަރަށް ޤައުމުގެ ނިޒާމު ބައްޓަންކުރަންޖެހޭ ކަމަށެވެ. އެގޮތުން ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެކީ ބާއްވަން ގާނޫނު އަސާސީ އަށް އިސްލާހު ހުށަހެޅުމަށް ނިންމާފައިވާކަން ރައީސް ހާމަކުރެއްވި އެވެ.

މީގެއިތުރުން ރައްޔިތުންގެ މަޖިލީހުގެ މެމްބަރުންގެ އަދަދު 77 އަށް މަދުކުރުމާއި ކައުންސިލްތަކުގެ ސައިޒު ކުޑަކުރަން ގާނޫނުތަކަށް އިސްލާހު ހުށަހެޅުމަށް ނިންމާފައިވާ ކަމަށްވެސް ވިދާޅުވި އެވެ.

ރައީސް ޑރ މުޢިއްޒު