ލ. ފޮނަދޫ ކައުންސިލުން ސަރުކާރަށް ހުށަހެޅި ކަންކަން ހައްލުކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނި މި ގޮތަށް ވިދާޅުވީ ލ. އަތޮޅަށް ކުރައްވާ ދަތުރުފުޅުގައި ފޮނަދޫ ކައުންސިލާއި އަންހެނުންގެ ކޮމެޓީ އަދި ރަށުގެ ބައެއް މުއައްސަސާތަކުގެ އިސް ވެރީންނާއެކު މިއަދު ބޭއްވެވި މަޝްވަރާ ބައްދަލުކުރެއްމުގަ އެވެ.
މި ބައްދަލުކުރެއްމުގައި ކައުސިލުން ވަނީ، ރަށުގެ އިހުތިސާސްގައި ގާދޫ ހިމަނައިދިނުމަށް އެދިލައްވާފަ އެވެ. ހަމައެއާއިއެކު އިސުކޫލުގެ އިމާރާތް ނުނިމި ލަސްވާތީ ދިމާވާ ދަތިތަކާއި، ރަށަށް ހޮސްޕިޓަލެއް ބޭނުންވާކަމުގައި މެންބަރުން ފާހަގަ ކުރެއްވި އެވެ.
މީގެ އިތުރުން ރަށުގައި ބަންކަރިންގެ ހިދުމަތް ފަށަން ބޭނުންވާކަމާއި ޕަބްލިކް ވޯކްސްގެ ހިދުމަތް ދިނުމަށް އިކުއިޕްމެންޓްސް ބޭނުންވާކަން ކައުންސިލުން ފާހަގަ ކުރެއްވި އެވެ.
ރަށުގައި ހުއްޓިފައިހުރި މަސައްކަތްތަކުގެ ތެރޭގައި ހިމެނޭ، ފުލުހުންގެ އިމާރާތާއި، ފުޓްސަލް ދަނޑާއި، ޒުވާނުންގެ މަރުކަޒާއި، ބޮޑު ފުޓްބޯޅަ ދަނޑުގެ މަސައްކަތް އަވަހަށް ނިންމައިދިނުމަށް ކައުންސިލުން އެދިލެއްވި އެވެ.
ފޮނަދޫ ޒުވާނުންގެ ފަރާތުން ވަނީ، ރަށުގެ ފުއްޓަރުފަރާތުގައި ޖެޓީއެއް ހަދައިދިނުމަށް ވެސް އެދިފަ އެވެ.
މި ބައްދަލުކުރެއްވުމުގައި ރައީސް ޑރ. މުއިއްޒު ވަނީ ކައުންސިލުން ފާހަގަކުރެއްވި ކަންކަން ބައްލަވާނެކަމުގައި ވިދާޅުވެފަ އެވެ.
ކޮމެންޓް