ރައީސް ޑރ. މުހައްމަދު މުއިއްޒު ލ. ހިތަދޫ ކައުންސިލާއި، އަންހެނުންގެ ކޮމިޓީ އަދި ރަށުގެ ބައެއް މުއައްސަސާތަކުގެ އިސްވެރިންނާ ބައްދަލުކުރައްވައި ރައްޔިތުންނަށް އެންމެ މުހިންމު ކަންކަމާ ގުޅޭ ގޮތުން މަޝްވަރާކުރައްވައިފި އެވެ.
މި ބައްދަލުކުރެއްވުން ކުރިއަށް ގެންދިޔައީ ހިތަދޫ ކައުންސިލް އިދާރާގަ އެވެ.
ބައްދަލުކުރެއްވުމުގައި ކައުންސިލް މެމްބަރުން ދެއްކެވި ވާހަކަފުޅުގައި ރަށުގެ ތަރައްގީއަށް އެންމެ ބޭނުން ކަންކަން ވަނީ ހިއްސާ ކުރައްވާފަ އެވެ.
އެ ގޮތުން ކައުންސިލުން ފާހަގަ ކުރެއްވި ކަންތައްތަކުގެ ތެރޭގައި އިސްކޫލުގެ މަލްޓި ޕާޕަސް ހޯލަކާއި އިތުރު ވަސީލަތްތައް ނެތުމުން ދިމާވާ ދަތިތައް ހިމެނެ އެވެ. މީގެ އިތުރުން ރަށުގެ ސިއްހީ މަރުކަޒުގެ މިހާރުގެ ހާލަތާއި، ރަށުގައި ކަރަންޓު ދިނުމަށް ބޭނުންވާ ޕަވާ ހައުސްއެއް ނެތުމުން ދިމާ ދަތިތައް މެންބަރުން ފާހަގަ ކުރެއްވި އެވެ.
މި ބައްދަލު ކުރެއްވުމުގައި ރައީސް ޑރ. މުއިއްޒު ވަނީ ކައުންސިލުން ފާހަގަ ކުރެއްވި ކަންކަން ބައްލަވާނެކަމުގައި ވިދާޅުވެފަ އެވެ.
މިއަދުގެ ބައްދަލަކުރެއްވުމުގައި ބައިވެރިވެވަޑައިގެންނެވި ވަޒީރުންނާއި، ދައުލަތުގެ ކުންފުނިތަކުގެ ވެރިން މެދުވެރިކުރައްވައި އެ މަނިކުފާނު ވަނީ ރަށުގައި ކުރިއަށްދާ މަޝްރޫއުތަކުގެ އެންމެ ފަހުގެ މައުލޫމާތުތައް ވެސް ހިއްސާ ކުރައްވާފަ އެވެ.
ކޮމެންޓް