އޮލިމްޕަހުގައި އަޅުވަން ތައްޔާރުވަމުން އަންނަ ދިވެހި ފިލްމު އިލްޒާމް 90 އަށްވުރެ ގިނަ ރަށުގައި ދައްކަން މިހާރު ވަނީ ހަމަޖެހެފަ އެވެ.
މި މަހުގެ 20 ގައި ރިލީސް ކުރުމަށް ހަމަޖެހިފައިވާ މި ފިލްމު އާންމުކޮށް ރަށްރަށުގައި އަޅުވާނީ އެ ރަށަކުން ހަމަޖައްސާފައި ހުންނަ އެޖެންޓެކެވެ. އިލްޒާމް އަޅުވަން މިހާ ގިނަ އަދަދެއްގެ ރަށްރަށުން ބޭނުންވެފައިވާކަމީ ފިލްމުގެ ކާމިޔާބުކަން ފެންނަ ކަމެކެވެ.
އަދި ކޮންމެ ރަށެއްގައި ފިލްމު އަޅުވާ ދުވަސް ކަނޑައެޅުމުން" އިލްޒާމް"ގެ ސޯޝަލް މީޑިއާގެ އެކި ޕޭޖުތަކުގައި އެ ކަން އިއުލާނު ކުރަމުން މިހާރު އެބަ ގެންދެ އެވެ. އަތޮޅު ތެރޭގެ ރަށްރަށުގެ އިތުރުން ގިނަ އަދަދެއްގެ ރިސޯޓުތަކުގައި ވެސް އިލްޒާމް އަޅުވަން ވަނީ ނިންމާފަ އެވެ.
މި ފިލްމަކީ ދިވެހި މުޖުތަމައުން ފެނިގެންދާ އާއިލީ ގިނަ މައްސަލަތަކާއި، މުޖުތަމައުގައި ފަހަކަށް އައިސް ކަން ހިނގަމުންދާ ގޮތް ވަރަށް ފުރިހަމައަށް ދައްކުވައިދޭނެ ފިލްމެކެވެ. ހާއްސަކޮށް، ދަރިންނާއި މައިންބަފައިންނާ ދެމެދުގައި އުފެދޭ ގުޅުންތަކާއި، ނާޒުކު ހާލަތްތަކުގައި ގޮތް ނިންމަން ޖެހޭ ކަންކަން މި ފިލްމުން ފެނިގެންދާނެކަމަށް ބެލެވެ އެވެ.
މި ފިލްމުން ފެންނާނެ ތަރިންގެ ތެރޭގައި އަހުމަދު ނިމާލް އާއި މަރިޔަމް ޝަކީލާ ފަދަ ތަރީންނާއި ޔޫއްޕެ އަދި ޖުމައްޔިލް ފަދަ ތަރީން ހިމެނެ އެވެ. ފިލްމުގެ ޓިކެޓް މިހާރު ދަނީ އޮލިމްޕަހުގައި ވިއްކަމުންނެވެ.
ރަށްރަށުގެ އިތުރުން ރިސޯޓުތަކުގައި ފިލްމު އެޅުވުމަށް ގުޅާނީ 9105590، މި ނަންބަރަށެވެ.
ކޮމެންޓް