ޔޫއްޕެ ޕްރޮޑަކްޝަނުން ޔޫސުފް ޝަފީޢު ޑައިރެކްޓްކޮށް، މުޙައްމަދު ޢަބްދުالله ޕްރޮޑިއުސްކޮށް އުފައްދާ ދިވެހި ފިލްމް އިލްޒާމްގެ ޓިކެޓް މިއަދު ވިއްކަން ފަށާގޮތަށް ހަމަޖެހިއްޖެއެވެ.
އެގޮތުން މިއަދު މެންދުރު 2:00 ގައި ޓިކެޓް ވިއްކަން ފަށާއިރު، އޮކްޓޯބަރ 6 ގެ ނިޔަލަށް ޓިކެޓް ބައްލަވައިގަންނަވާ ފަރާތްތަކުގެ މެދުގައި ގުރުއަތުން ހޮވޭ ފަރާތަކަށް އައިފޯން 17 ޕްރޯއެއް ދިނުމަށް ވަނީ ނިންމާފައެވެ.
މިއީ އީ ޕްލެޓިނަމްގެ ފަރާތުން ސްޕޮންސަރކޮށްދެއްވާފައިވާ ހަދިޔާއެވެ. މި ފޯނު ލިބޭ ނަސީބުވެރިޔާ ހޮވުމަށް ހަމަޖެހިފައިވަނީ އޮކްޓޯބަރ 20 ވަނަ ދުވަހުގެރޭ އޮންނަ މި ފިލްމްގެ ޕްރިމިއާރ ނައިޓްގައެވެ.
މި ފިލްމްގައި ގިނަ އަދަދެއްގެ މަޝްހޫރު ތަރިން ހިމެނެއެވެ. އެގޮތުން، އަހުމަދު ނިމާލް، މަރިޔަމް ޝަކީލާ، މުހައްމަދު ރަޝީދު [ދަރާ] ޔޫސުފް ޝަފީޢު ]ޔޫއްޕެ]، ޖުމައްޔިލް ނިމާލް، އާމިރާ އިސްމާއިލް، އަޙްމަދު ސައީދު، މުހައްމަދު ފައިސަލްގެ މުހިއްމު ރޯލްތަކެއް މި ފިލްމުން ފެނިގެން ދާނެއެވެ. އަދި މިހާރު އަރަމުން އަންނަ ތަރިން ކަމަށްވާ މަރިޔަމް ޝިފާ، ޝަހީދާ އަހްމަދް[ޑޯރާ]، ލައިޝާ ލަތީފް މި ފިލްމުން ފެނިގެންދާނެއެވެ.
މި ފިލްމްގެ ކުޑަ ކުއްޖެއްގެ ރޯލުން އަލަށް ތައާރަފްވާ ކިންޒާ ހުސައިން[ގޮމަ]ގެ ހުނަރުވެރިކަންވެސް މި ފިލްމްއިން ފެނިގެންދާނެއެވެ.
ފިލްމަކީ ދިވެހި މުޖުތަމަޢުން ފެނިގެންދާ އާއިލީ ގިނަ މައްސަލަތަކާއި، މުޖުތަމަޢުގައި ފަހަކަށް އައިސް ކަން ހިނގަމުންދާ ގޮތް ވަރަށް ފުރިހަމައަށް ދައްކުވައިދޭނެ ފިލްމެކެވެ.
ޚާއްސަކޮށް، ދަރިންނާއި މައިންބަފައިންނާ ދެމެދުގައި އުފެދޭ ގުޅުންތަކާއި، ނާޒުކު ހާލަތްތަކުގައި ގޮތް ނިންމަން ޖެހޭ ކަންކަން މި ފިލްމުން ފެނިގެންދާނެކަމަށް ބެލެވެއެވެ. މިފަދަ ފިލްމުތަކަކީ އަބަދުވެސް ދިވެހި ބެލުންތެރިންގެ މެދުގައި މަގުބޫލުކަން ހޯދާ ފިލްމުތަކެކެވެ.
ކޮމެންޓް