ފައިސާ ޗާޕު ކުރުން ހުއްޓާލުން ވެގެން ދިޔައީ އުނދަގޫ ކަމަކަށް ކަމަށާއި، އެހެންނަމަވެސް ފައިސާ ޗާޕުނުކޮށް އެކި ފަރާތްތަކަށް 13 ބިލިއަން ރުފިޔާ މިހާރުވެސް ދައްކާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ޕީއެންސީ ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް މުއިއްޒު ވިދާޅުވީ ސަރުކާރުގެ އިޤްތިސާދީ އެޖެންޑާގައިވާ ކަންކަން ހާސިލު ކުރުމަށް މަސައްކަތް ކުރަމުން ގެންދާ ކަމަށާއި އެގޮތުން މިހާތަނަށް ހާސިލު ކުރެވުނު އެންމެ ބޮޑު ކާމިޔާބީއަކީ ފައިސާ ޗާޕުކުރުން ހުއްޓާލުން ކަމަށެވެ.

ރައީސް މުއިއްޒު ވިދާޅުވީ ފައިސާ ޗާޕުކުރުން ހުއްޓާލަން ނިންމި ނިންމުމަށް ބައިނަލްއަޤްވާމީ މާލީ އިދާރާތަކުން ތައުރީފުކޮށްފައިވާ ކަމަށެވެ.

މީގެއިތުރުން ރައީސް މުއިއްޒު ވިދާޅުވީ ފައިސާ ޗާޕުނުކޮށް އަދި ލޯނު ނުނަގައި އާމްދަނީގެ ގޮތުގައި ލިބުނު ފައިސާއިން 13 ބިލިއަން ރުފިޔާ އެކި ފަރާތްތަކަށް ދައްކާފައިވާކަމަށެވެ. އެގޮތުން އަމިއްލަ ކުންފުނިތަކުން ކުރި މަސައްކަތްތަކަށް ދޭންޖެހޭ 9 ބިލިއަން ރުފިޔާގެ ތެރެއިން 4 ބިލިއަން ރުފިޔާ އަދި ސަރުކާރުގެ އެކި ކުންފުނިތަކަށް ދައްކަންޖެހޭ 7 ބިލިއަން ރުފިޔާގެ އިތުރުން ބޭރު ލޯނުތަކަަށް ދައްކަންޖެހޭ 2.7 ބިލިއަން ރުފިޔާއާއެކު ޖުމްލަ 13 ބިލިއަނެއްހާ ރުފިޔާ ދައްކާފައިވާ ކަމަށެވެ.

ފައިސާ ޗާޕުކުރުން ހުއްޓާލުމަކީ ރާއްޖެއަށް ވަރަށް މުހިންމުވި ނިންމުމެއް ކަމަށާއި، އެކަމުގެ ފައިދާ މިހާރު ފެންނަން ފަށާފައިވާ ކަމަށްވެސް ރައީސް މުއިއްޒު ވިދާޅުވިއެވެ.