ހދ. އަތޮޅުގެ ތަރައްގީއަށް ބޭނުންވާ ކަންކަން ނައިބު ރައީސްއާ ހިއްސާކޮށްފި

ނައިބު ރައީސް ހުސައިން މުޙައްމަދު ލަތީފް، ހދ. އަތޮޅު ކައުންސިލުގެ މެންބަރުންނާ މިއަދު ބައްދަލު ކުރައްވައިފި އެވެ.

ރައީސް އޮފީހުގައި މިއަދު ހެނދުނު އޮތް މި ބައްދަލުކުރެއްވުމުގައި އަތޮޅު ކައުންސިލުގެ މެންބަރުން ވަނީ، މުޅި އަތޮޅުގެ ތަރައްގީއަށް އެންމެ ބޭނުންވާ ކަންކަމާއި އަތޮޅުގެ ވަކިވަކި ރަށްރަށަށް ބޭނުންވާ ކަންކަން ފާހަގަ ކުރައްވާފަ އެވެ.

އެގޮތުން، އަތޮޅުގައި ރައްޔިތުންނަށް ފަސޭހަވާނޭ ގޮތަށް ފަތުރުވެރިކަން ތަރައްގީކުރުމަށް ބޭނުންވާ ކަމާއި، އަތޮޅުގައި ވީހާ ވެސް އަވަހަކަށް ހައުސިން ޔުނިޓް ގާއިމު ކުރުމަށް ބޭނުންވާ ކަމާއި، ކުޅުދުއްފުށީ އެއާޕޯޓަށް ބާއްވާ އުދުހުންތައް މަދުވުމުން ދިމާވާ ދަތިތައް މެންބަރުން ފާހަގަކުރެއްވިއެވެ.

އަދި ހިރިމަރަދޫ ރައްޔިތުން އެހެން ރަށަކަށް ބަދަލުކުރުމުގެ މަސައްކަތް އަވަސް ކޮށްދެއްވުމަށް އެދިވަޑައިގެން، އަތޮޅުގެ ރަށްތަކުގެ ކުނި ނައްތާލުމުގެ ރަނގަޅު ނިޒާމެއް ނެތުމުން ދިމާވާ ދަތިތައް ވެސް އެ ބޭފުޅުން ހިއްސާ ކުރެއްވި އެވެ.

މީގެއިތުރުން އިގުތިސާދީ ގޮތުން މަންފާ ހޯދުމަށް ބޭނުން ކުރުމަށް ހދ. ފަރިދޫ ދޫކޮށްދެއްވައި، އަތޮޅުގައި ފަށާފައިހުރި މަޝްރޫއުތައް އަވަހަށް ނިންމަވައިދެއްވުމަށް ވެސް އަތޮޅު ކައުންސިލުން އެދިވަޑައިގެންނެވި އެވެ.

ހދ. އަތޮޅު ކައުންސިލުން ވަނީ މި ސަރުކާރަށް ފުރިހަމަ އެއްބާރުލުން ދެއްވާނެކަމުގެ ޔަގީންކަން ވެސް ދެއްވާފަ އެވެ.

މި ބައްދަލުވުމުގައި ނައިބު ރައީސް ވަނީ، ކައުންސިލުން ހުށަހެޅުއްވި ހުރިހާ ކަމަކަށް ވެސް ސަމާލުކަން ދެއްވާނެކަމުގެ ޔަގީންކަން ދެއްވާފަ އެވެ. އަދި ކައުންސިލް މެންބަރުން ފާހަގަ ކުރެއްވި ކަންކަމަށް އަވަސް ހައްލެއް ހޯދަދޭން ކަމާ ގުޅުންހުރި އިދާރާތަކާ މަޝްވަރާ ކުރައްވައިގެން ކުރިއަށްގެންދަވާނޭ ކަމަށް ނައިބު ރައީސް ހުސައިން މުޙައްމަދު ވިދާޅުވި އެވެ.