އެމްޓީސީސީން ހިއްސާ އަކަށް 2 ރުފިޔާ ބަހަން ފާސްކޮށްފި

އެމްޓީސީސީގެ އާންމު އަހަރީ ޖަލްސާގެ ތެރެއިން: ފޮޓޯ/ އެމްޓީސީސީ

މޯލްޑިވްސް ޓްރާންސްޕޯޓްސް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހިއްސާ އަކަށް ދެ ރުފިޔާ ބަހަން ފާސްކޮށްފި އެވެ.

އެމްޓީސީސީން ހިއްސާދާރަކަށް ދެ ރުފިޔާ ބަހަން ފާސްކޮށްފައި ވަނީ ބާސެލޯ ނަސަންދުރާގެ "އަރި" ބޯލްރޫމްގައި، އަންގާރަ ދުވަހުގެ ރޭ ބޭއްވި އެ ކުންފުނީގެ އަހަރީ އާންމު ޖަލްސާގަ އެވެ.

އަހަރީ އާންމު ޖަލްސާގައި އެޖެންޑާ އައިޓަމްތަކަށް ވޯޓުލުން ކުރިއަށް ގެންގޮސްފައިވަނީ ޖަލްސާއަށް ހިއްސާދާރުން ހާސިރުވެގެންނާއި އަދި ހިއްސާދާރުން ބޭނުންވާ ނަމަ އޮންލައިންކޮށް ވެސް ބައިވެރިވެ ވޭގޮތަށް މޯލްޑިވްސް ސެކިއުރިޓީޒް ޑިޕޮސިޓަރީގެ އޮންލައިން ވެބް އެޕްލިކޭޝަން "ފަހިވޯޓް" މެދުވެރި ކޮށެވެ.

ޖަލްސާއަށް ހާޒިރުވެތިބީ މުޅިއެކު 156 ހިއްސާދާރުންނެވެ. އެއީ މުޅިއެކު 5,587,737 ހިއްސާ އެވެ. އެއީ ކުންފުނީގެ ރައުސުލްމާލުގެ 69.52 އިންސައްތަ ހިއްސާދާރުންނެވެ.

އަހަރީ އާންމު ޖަލްސާގައި ޑިރެކްޓަރުންގެ ބޯޑުން ނިންމާފައި ވަނީ މޫނުމަތީ އަގުގެ ފަސް ރުފިޔާގެ ހިއްސާ އަކަށް ދެ ރުފިޔާ ކޮންމެ ހިއްސާދާރާކަށް ބަހާށެވެ.

އަދި ކުންފުނީގެ މިދިޔަ އަހަރުގެ ޑިރެކްޓަރުންގެ ރިޕޯޓާއި، އޮޑިޓް ކޮށްފައިވާ މާލީ ހިސާބުތަކާއި، 2023 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ވަނީ ފާސްކޮށްފައެވެ. އޭގެ އިތުރުން މިއަހަރަށް ކުންފުނީގެ އެކްސްޓާނަލް އޮޑިޓަރުގެ ގޮތުގައި ކަނޑައަޅާފައިވަނީ 'ޑެލޮއިޓް ޕާޓްނާސް' އެވެ.

އެމްޓީސީސީ