ބްރޯޑްކޮމްގެ މެމްބަރު ކަމަށް ޒަމްއަތު އައްޔަން ކުރައްވައިފި

ޒަމްއަތު އަހުމަދު ވަހީދު

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ މެންބަރުކަމަށް ގދ. ތިނަދޫ، މަލަ، ޒަމްއަތު އަހުމަދު ވަހީދު މިއަދު އައްޔަން ކުރައްވައިފި އެވެ.

ޒަމްއަތު، މި މަގާމަށް އައްޔަން ކުރައްވާފައި ވަނީ، ބްރޯޑްކާސްޓް ކުރުމުގެ ގާނޫނުގެ 6 ވަނަ މާއްދާގެ (ހ)ގައިވާ ގޮތުގެމަތިން، ރައްޔިތުންގެ މަޖިލީހަށް ނަން ހުށަހަޅުއްވައި، މަޖިލީހުގެ ރުހުން ލިބިވަޑައިގަތުމުންނެވެ.

ބްރޯޑްކޮމްގެ މެންބަރު ކަމަށް ޒަމްއަތު އައްޔަން ކުރައްވާފައިވާއިރު, އެ ކޮމިޝަންގެ މެންބަރު އައިމިނަތު އަމީނާގެ މަގާމުގެ މުއްދަތު ވަނީ މި މަހުގެ 14ވަނަ ދުވަހު ހަމަވެފަ އެވެ.

އެހެންކަމުން އެ މަގާމަށް ބޭފުޅަކު އައްޔަން ކުރެއްވުމަށް ރައީސް އޮފީހުން އާންމުކޮށް ހުޅުވާލުމުން، ކުރިމަތިލެއްވި ފަރާތްތަކުގެ ތެރެއިން ޝަރުތު ހަމަވާ ހަ ބޭފުޅެއްގެ ނަން ރައީސުލްޖުމްހޫރިއްޔާ މަޖިލީހަށް ފޮނުއްވި އެވެ. އެ ހަ ބޭފުޅެއްގެ ތެރެއިން އެންމެ ކުރީގައި އޮތީ ވެސް ޒަމްއަތުގެ ނަމެވެ.

ރައްޔިތުންގެ މަޖިލީހުގެ އިއްޔެގެ ޖަލްސާގައި ނެގި ވޯޓްގައި ޒަމްއަތު، އެ މަގާމަށް އައްޔަން ކުރުމަށް ފާސް ކުރީ 56 މެމްބަރުންގެ އިއްތިފާގުންނެވެ.

ރައީސް އޮފީސް މޯލްޑިވްސް ބްރޯޑްކާސްޓިންގ ކޮމިޝަން