ހެލްތް މިނިސްޓްރީގެ ޕީއެސްގެ މަގާމަށް މީހަކު ހޯދަނީ

ސިވިސް ސާވިސް ކޮމިޝަން: ފޮޓޯ/ ދިޔަރެސް

ހެލްތް މިނިސްޓްރީގެ ޕާމަނަންޓް ސެކްރެޓަރީ (ޕީއެސް) ގެ މަގާމަށް ބޭފުޅަކު ހޯދަން ސިވިލް ސާވިސް ކޮމިޝަން (ސީއެސްސީ) އިން މިއަދު އިއުލާނުކޮށްފި އެވެ.

އެ ކޮމިޝަނުން ކުރި އިއުލާނުގައި ބުނީ ޕީއެސްގެ މަގާމަށް ޝަރުތު ހަމަވާ ފަރާތްތަކުން އަންނަ ޖުލައި މަހުގެ ހަ ވަނަ ދުވަހުގެ 14:00 ގެ ކުރިން ސީއެސްސީއަށް ހުށަހެޅޭނެ ކަމަށެވެ.

ހެލްތް މިނިސްޓްރީއަށް ޕީއެސްއެއް ހޯދަން އިއުލާނުކޮށްފައި މިވަނީ އެ މަގާމު މި އަހަރުގެ އޯގަސްޓް ނުވަ ވަނަ ދުވަހު ހުސްވާނެތީ އެވެ.

ޕީއެސްގެ ޝަރުތުތަކުގެ ތެރޭގައި ގައުމީ ސަނަދުތަކުގެ އޮނިގަނޑުން ދަށްވެގެން ލެވެލް 7 ގެ ސަނަދެއް ހާސިލުކޮށްފައިވުމާ އެކު، ސަރުކާރުގައި ނުވަތަ ޕަބްލިކް ޕްރައިވެޓް ނުވަތަ ނުވަތަ ބައިނަލްއަގުވާމީ ޖަމުއިއްޔާ ނުވަތަ ޖަމާއަތެއްގެ ހިންގުމުގެ ދާއިރާގައި މަދުވެގެން 6 އަހަރު ދުވަހު މަސައްކަތްކޮށް ތަޖުރިބާ ލިބިފައިވުން ހިމެނެ އެވެ.

ނުވަތަ ގައުމީ ސަނަދުތަކުގެ އޮނިގަނޑުން ދަށްވެގެން ލެވެލް 9 ގެ ސަނަދެއް ހާސިލުކޮށްފައިވުމާ އެކު، ސަރުކާރުގައި ނޫނީ ޕަބްލިކް ޕްރައިވެޓް ނުވަތަ ގައުމީ ނޫނީ ބައިނަލްއަގުވާމީ ޖަމުއިއްޔާ ނުވަތަ ޖަމާއަތެއްގެ ހިންގުމުގެ ދާއިރާގައި މަދުވެގެން 4 އަހަރު ދުވަހު މަސައްކަތްކޮށް ތަޖުރިބާ ލިބިފައިވުން ހިމެނޭ ކަމަށް އިއުލާންގައިވެ އެވެ.

ޕީއެސްއަކަށް މުސާރައިގެ ގޮތުގައި ކޮންމެ މަހަކު 20،500ރ. އަދި ލިވިން އެލަވަންސްގެ ގޮތުގައި މަހަކު 15،000ރ. ލިބޭނެ އެވެ.

މިނިސްޓްރީ އޮފް ހެލްތް