"ހައްޖު އެރައިވަލް އޮޕަރޭޝަން" ކާމިޔާބުކަމާ އެކު ނިންމާލައިފި

މިއަހަރު ހައްޖުގެ މަތިވެރި އަޅުކަން އަދާކުރުމަށް ފަހު އެނބުރި ރާއްޖެ އަންނަ ހައްޖާޖީންނަށް އެހީތެރިކަން ފޯރުކޮށްދިނުމަށް އެމްއެންޑީއެފް މާލެ އޭރިއާ ކޮމާންޑުން ފެށި "ހައްޖު އެރައިވަލް އޮޕަރޭޝަން" ކާމިޔާބުކަމާ އެކު ނިންމާލައިފި އެވެ.

"ހައްޖު އޮޕަރޭޝަން 2025" ނަމުގައި، ކުރިއަށް ގެންދިޔަ މި އޮޕަރޭޝަންގައި އެމްއެންޑީއެފުން ހައްޖުވެރީންނަށް އެހީތެރިވެފައިވަނީ ސަރުކާރުން ހައްޖާޖީންނަށް ކަނޑައަޅާފައިވާ އިންތިޒާމުތައް ހަމަޖައްސައިދިނުމުގައި އިސްލާމިކް މިނިސްޓްރީއަށް ބޭނުންވާ އެހީތެރިކަން ފޯރުކޮށްދިނުމަށް އެމްއެންޑީއެފް މާލެ އޭރިއާ ކޮމާންޑުން، ޖޫން 13އިން ޖޫން 17އަށް ކުރިއަށްގެންދިޔަ ހާއްސަ އޮޕަރޭޝަނުގެ ތެރެއިންނެވެ.

މި އޮޕަރޭޝަނުގައި، ހައްޖާޖީން ހައްޖުގެ މަތިވެރި އަޅުކަން އަދާކުރުމަށް ފަހު ރާއްޖެ އެނބުރި އައުމުން ސަރުކާރުން ކަނޑައަޅާފައިވާ އިންތިޒާމްތައް ހަމަޖައްސައިދިނުމުގައި އެހެނިހެން މުއައްސަސާތަކާ ގުޅިގެން އެމްއެންޑީއެފް މާލެ އޭރިއާ ކޮމާންޑުން ވަނީ މަސައްކަތްކޮށްފަ އެވެ.

 މީގެ ކުރިން އެމްއެންޑީއެފް މާލެ އޭރިއާ ކޮމާންޑުން ވަނީ މި އޮޕަރޭޝަނުގައި ހައްޖާޖީން ރާއްޖެއިން ފުރި ދުވަސްތަކުގައި، މާލެއިން އެއާޕޯޓަށް ލަގެޖުތައް ގެންދިއުމުގައި އެހީތެރިކަން ފޯރުކޮށްދިނުމުގެ އިތުރުން، އެއާޕޯޓުގައި އެކިއެކި އިންތިޒާމްތައް ހަމަޖައްސައިދިނުމުގައި އެހީތެރިކަން ފޯރުކޮށްދީފަ އެވެ.

އަދި އެއާޕޯޓު ޓާމިނަލްގައި ހައްޖާޖީންނަށް އެހީތެރިކަން ފޯރުކޮށްދިނުމަށް ކަމާ ބެހޭ އެހެނިހެން މުއައްސަސާތަކާ ގުޅިގެން މަސައްކަތްކޮށްފައިވެ އެވެ.

މި އޮޕަރޭޝަނުގައި މާލެ އޭރިއާ ކޮމާންޑްގެ ކޮމްޕޯނަންޓްތައްކަމަށް ވާ އެމްޑީޔޫ 2، އެމްޑީޔޫ 3 އަދި އެމްޑީޔޫ 4 ގެ މެރިންސް ވަނީ އަމަލީ ގޮތުން ހަރަކާތްތެރިވެފަ އެވެ.