އޭޝިއާ ކަޕް އަންހެން ކޮލިފައިން އިން ރާއްޖެއަށް ލިބުނީ ތިންވަނަ

އޭޝިއާ ކަޕް ކޮލިފައިންގައި ރާއްޖެ ކުޅެނީ: ފޮޓޯ/ ހެލްތް މިނިސްޓްރީ

ފީބާ، 16 އަހަރުން ދަށުގެ އޭޝިއާ ކަޕް، ސާބާ ކޮލިފައިންގައި ރާއްޖޭގެ ޒުވާން އަންހެން ޓީމުން ބަންގްލަދޭޝް ބަލިކޮށް ލޯ މެޑަލް ހޯދައިފި އެވެ.

އިއްޔެ މެންދުރު ޒުވާނުންގެ މަރުކަޒުގައި ކުޅުނު ތިންވަނަ ހޮވާ މެޗުގައި ރާއްޖެއިން ބަންގްލަދޭޝް ބަލިކުރީ 86-22 ޕޮއިންޓުންނެވެ.

މި މެޗުގެ ފުރަތަމަ ކުއާޓާ ރާއްޖެއިން ނިންމާލީ 23-0 ގެ ބޮޑު ލީޑެއްގައި އޮވެގެންނެވެ. ދެވަނަ ކުއާޓާ ނިމުނުއިރު ރާއްޖެއަށް 38 ޕޮއިންޓް ލިބުނުއިރު ބަނގްލަދޭޝްއަށް ލިބުނީ އެންމެ ޕޮއިންޓެކެވެ.

ތިން ވަނަ އަދި ހަތަރުވަނަ ކުއާޓާގައި ރާއްޖެއިން ވަނީ ބަދަލު ކުޅުންތެރިންނަށް ފުރުސަތު ދީފައެވެ. ތިންވަނަ ކުއާޓާ ނިމުނުއިރު ރާއްޖެއިން 56 ޕޮއިންޓް ހޯދިއިރު ބަނގްލަދޭޝްއަށް ހޯދުނީ 9 ޕޮއިންޓެވެ. ފަހު ކުއާޓާގައި ބަންގްލަދޭޝްއިން ހިތްވަރުކުރި ނަމަވެސް ރާއްޖެއިން ވަނީ ލީޑު ދަމަހައްޓައި، 86-22 އިން މެޗު ކާމިޔާބުކޮށްފަ އެވެ.

މި މެޗުގައި ރާއްޖެ ޓީމުން އެންމެ ރަނގަޅަށް ކުޅުނު، ލައިރާ އަހުމަދު ފިރާޝް ވަނީ 12 ޕޮއިންޓް ސްކޯކޮށް، 20 ރީބައުންޑް ނަގައިފަ އެވެ. ދެން، އެންމެ ރަނގަޅަށް ކުޅުނު މަރިޔަމް ކައިލީން ޝިރުހާން ވަނީ 30 ޕޮއިންޓް ސްކޯކޮށް، ހަ ރީބައުންޑް ނަގާފަ އެވެ. ކައިލީން ސްކޯކުރި 30 ޕޮއިންޓްގެ ތެރެއިން ގިނަ ޕޮއިންޓަކީ ތްރީ ޕޮއިންޓްތަކެވެ.

މިއީ ރާއްޖޭގެ ޒުވާން ބާސްކެޓްބޯޅަ އަންހެން ޓީމެއް ސަރަހައްދީ ބާސްކެޓްބޯޅަ މުބާރާތަކުން ހޯދި ފުރަތަމަ މެޑަލް އެވެ.

ކުޅިވަރާއި ހަށިހެޔޮކަމާ ބެހޭ ވުޒާރާ