"ބައިނަލްއަގުވާމީ މައިދާނުގައި މަސްވެރި ސިނާއަތުގެ އަޑު އިއްވަންޖެހޭ"

ފިޝަރީޒް މިނިސްޓަރު އަހުމަދު ޝިޔާމް --

ބައިނަލްއަގުވާމީ މައިދާންތަކުގައި ކުދި މަސްވެރިންގެ ސިޔާސަތާއި، އިންވެސްޓްމެންޓުތަކުގެ ވާހަކަ ގިނަގިނައިން ދައްކަންޖެހޭ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ޔުނައިޓެޑް ނޭޝަންސް އޯޝަންސް ކޮންފަރެންސްގެ ތިން ވަނަ ބައްދަލުވުމުގެ ހަވާސާގައި ރާއްޖެއިން އިސް ނަގައިގެން ދެމެހެއްޓެނިވި ގޮތެއްގައި ކުދި މަސްވެރިކަން މެނޭޖުކުރުމަށް ބާރުއެޅުމާ ގުޅޭ ހާއްސަ ބައްދަލުވުމުގަ އެވެ.

މި ސެޝަންގައި ކުދި މަސްވެރިންގެ ސިޔާސަތުތަކުގެ ވާހަކަ ގިނަގިނައިން ދައްކަންޖެހޭނެކަން ފާހަގަ ކުރައްވަމުން މިނިސްޓަރު ވިދާޅުވީ އެހެން ނަމަވެސް އެ ފަރާތްތަކުގެ ވާހަކަ އަންނަނީ ބައިނަލްއަގުވާމީ އެ ފަދަ މަޝްވަރާތަކުގެ ހަވާސާގައި އެކަނި ކަމަށެވެ.

ކުދި މަސްވެރިކަން ކުރާ ފަރާތްތައް ތިބީ ސިޔާސަތުތަކާއި އިންވެސްޓްމަންޓާއި، އިނޮވޭޝަންގެ މާ ފަހަތުގައި ކަމަށާއި މިކަން ބަދަލުވާން ޖެހޭ ކަމަށް ވިދާޅުވެ، ސައިންސާއި ޓެކްނޮލޮޖީގައި ރާއްޖެއިން ކުރާ މަސައްކަތްތަކަށް ވެސް މިނިސްޓަރު ޝިޔާމްގެ ވާހަކަފުޅުގައި އަލިއަޅުއްވާލެއްވި އެވެ.

މި ސެޝަންގައި ސަރުކާރުތަކުން، ސަރަހައްދީ އަދި ބައިނަލްއަގުވާމީ ބައިވެރިންނާ ގުޅިގެން، ދެމެހެއްޓެނިވި ގޮތެއްގައި ކުދި މަސްވެރިކަން (އެސް.އެސް.އެފް) މެނޭޖުކުރުމަށް ކުރަމުންދާ މަސައްކަތްތައް ދިރާސާކޮށްފައިވެ އެވެ. އަދި ކަމާބެހޭ ކޭސް ސްޓަޑީސްތަކާއި ތަޖުރިބާކާރުންގެ މަޝްވަރާތައް ވެސް ސެޝަންގެ ތެރެއިން ކުރިއަށް ގެންގޮސްފައިވެ އެވެ.

ފިޝަރީޒް މިނިސްޓަރ އަޙުމަދު ޝިޔާމް