އާންމު ދަތުރުފަތުރުގެ ހިދުމަތެއްގެ ގޮތުގައި ދެމުން އަންނަ ބަހުގެ ހިދުމަތް މާލޭގައި އިތުރަށް ވަރުގަދަ ކުރުމަށްޓަކައި ބޭނުން ކުރާ ބަހުގެ އަދަދު އިތުރު ކުރަން ޖެހޭ ކަމަށް އެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.

މާލެ ސަރަހައްދާއި ރާއްޖޭގެ އާބާދީ ބޮޑެތި ބަހެއް ސަރަހައްދުތަކުގައި ބަހާއި ފެރީގެ ހިދުމަރް ދެމުން އަންނަނީ ކުރީގެ ސަރުކާރުގައި އޭނަ އެމްޓީސީސީގެ ސީއީއޯއަކަން ހުންނެވި އިރު، އެ ކުންފުންޏާ ސަރުކާރުން ހަވާލުކޮށްގެން ފެށި ރާއްޖެ ޓްރާސްޕޯޓް ލިންކް (އާރްޓީއެލް) ގެ ދަށުންނެވެ.

ދައުލަތުގެ މީޑިއާ ޕީއެސްއެމްގައި އާޒިމް ވިދާޅުވީ ޕަބްލިކް ޓްރާންސްޕޯޓް ހަރުދަނާކުރުމަށްޓަކައި މާލެ އަށް އިތުރު ބަސްތައް އިތުތު ކުރުން މުހިއްމު ކަމަށެވެ.

"އެއީ ކުރިން ކެޕޭސިޓީ ކަނޑައެޅިގެންދާ އިރު އަޅުގަނޑުމެން އޮޕްޝަންތަކެއް އެބަ ދޭން ޖެހޭ މީހުން ތަންތަނަށް ދާން އެގޮތަށް ވިސްނައިގެން، އެންމެން ވެގެން މިކަން ކުރެވޭނީ،" އޭނަ ވިދާޅުވި އެވެ.

އާޒިމް ވިދާޅުވީ އަމާޒަކީ ކުރިއަށް އޮތް ތިން މަސް ދުވަސް ތެރޭގައި މާލޭގައި ދުއްވޭނެ ވެހިކަލްތަކުގެ އަދަދު ކަނޑައެޅުން ކަމަށާއި ވެހިކަލް ލިމިޓް ކަނޑައެޅުމުގެ މަސައްކަތް ސިޓީ ކައުންސިލުން މިހާރު ކުރަމުން އަންނަ ކަމަށެވެ.

"މިހާ ކުޑަކުޑަ ތަނެއްގައި ބޭނުންހާ ވަރަކަށް އުޅަނދުތަކަށް ނޫޅެވޭނެ. މިހާރު މިސާލަކަށް މާލޭގައި އަޅުގަނޑުމެން މިއަދު އެކަން [ލިމިޓެއް ކަނޑަނާޅަައިފި ނަމަ] ނުކޮށްފި ނަމަ ކުރިއަށް އޮތް ފަސް އަހަރު ތެރޭގައި އެއްވެސް އުޅަނދަކަށް މިތާނގައި ކުރިއަކަށް ނުދެވޭނެ،" އޭނަ ވިދާޅުވި އެވެ. "ހަމަ ހުއްޓާލައިގެން ތިބެން ޖެހޭނީ."