ރައުދުގެ މައްޗަށް ދައުވާ ކުރަން ފޮނުވައިފި

ރައުދު

މިދިޔަ އޭޕްރީލް މަހުގެ 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު މައްސަލައާ ގުޅިގެން ގ. އެރިޔަދޫ، ރައުދު އަހްމަދު ޒިލާލްގެ މައްޗަށް ދައުވާކުރަން ކްރިމިނަލް ކޯޓަށް ފޮނުވައިފި އެވެ.

ޕްރޮސެކިއުޓާ ޖެނެރަލްގެ އޮފީސް (ޕީޖީ) އިން ބުނީ ރައުދުގެ މައްޗަށް ދައުވާ ކުރަށް ފޮނުވީ މިމަހުގެ ހަތަރު ވަނަ ދުވަހު ކަމަށެވެ.

ރައުދުގެ މައްޗަށް އުފުލާފައިވަނީ އެޕްރީލް 18، 2025 ދުވަހު 04:54 އެހައިކަށްހައިއިރު ހ. ފެންޓެނޯއީ ގޭގެ 9 ވަނަ ފަންގިފިލާގެ ސިޑި ގޮޅީގައި ހުންނަ ފެން ލައިޓުން (ކުޑަދޮރަކުން) ހ. މިޓާޒް ގޭގެ ފުރާޅު މައްޗަށް އަންހެނަކު ވެއްޓުނުކަން އެނގިހުރެ، އޭނާއަށް އެހީތެރިވެދީފައި ނުވާތީއާއި، އޭނާއަށް އެހީތެރިކަން ހޯދުމަށް އެދި ކަމާ ގުޅުންހުރި އެއްވެސް އިދާރާއަކަށް ރިޕޯޓުކޮށްފައިނުވާ ކަމުގެ ދައުވާ އެވެ.

މި ދައުވާ ސާބިތުވެއްޖެ ނަމަ، ރައުދުގެ މައްޗަށް އަންނާނީ އެއް މަހާއި ހަ ދުވަހުގެ ޖަލު ހުކުމެކެވެ.

މިޓާޒް ގޭގެ ފުރާޅު މައްޗަށް ޔުމުނު ވެއްޓިފައި އޮއްވާ ފެނުނީ އޭޕްރީލް 18 ވަނަ ދުވަހުގެ ހެނދުނު 07:23 އެހާއިރު އެވެ. ޔުމްނު ވެއްޓުނު ރޭ އޭނާ އާއެކު އުޅުނީ ރައުދު އެވެ.

މި މައްސަލައިގައި ފުލުހުން ފުރަތަމަ ބުނީ ޔުމްނު ވެއްޓިފައި ވަނީ އަމިއްލައަށް ކަމަށެވެ. އަދި އޭނާ ވެއްޓުމުގައި އެހެން މީހެއްގެ ބައިވެރިވުމެއް ނެތް ކަމަށް ވެސް ފުލުހުން އޭރު ބުންޏެވެ.

ރައުދު ޕީޖީ