ކަރަންޓު ކެނޑުނު މައްސަލަ ތަކުރާރުވިޔަ ނުދިނުމަށް ފިޔަވަޅު އަޅާނަން: ފަހުމީ

މާލޭ ސަރަހައްދުން ކަރަންޓު ކެނޑުނު ސަބަބު ދެނެގަތުމަށްފަހު، އެކަމުގެ ތަފުސީލު ހާމަކުރާނެ ކަމަށާއި އަދި އެފަދަ ކަމެއް ތަކުރާރުވިޔަ ނުދިނުމަށް ފިޔަވަޅު އަޅާނެ ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެ އެވެ.

ކަރަންޓުގެ ހިދުމަތް ކެނޑުނީ މިއަދު ގާތްގަނޑަކަށް 12:30 ހާއިރު އެވެ.

މިމައްސަލައާ ގުޅުވައިގެން ފަހުމީ ކުރެއްވި އެކްސް ޕޯސްޓެއްގައި ވިދާޅުވީ ގްރޭޓާ މާލެ އިންޓާކަނެކްޝަން ގުރިޑަށް ކުރިމަތިވެފައިވާ މައްސަލަ މިހާރު ހައްލުކުރެވި، މާލެ އާއި ހުޅުމާލެއަށް ކަރަންޓުގެ ހިދުމަތް އަލުން ފޯރުކޮށްދެވިފައިވާ ކަމަށެވެ. ކަރަންޓު އަލުން ދިނުމަށް ޓަކައި އެ ކުންފުނީގެ މުވައްޒަފުންނާއި، އެކި ގޮތްގޮތުން އެހީތެރިވެދިން އެންމެހައި ފަރާތްތަކަށް ފަހުމީ ވަނީ ޝުކުރު އަދާ ކުރައްވާފަ އެވެ.

ފަހުމީ ވިދާޅުވީ މިފަދަ ހާދިސާއެއް ތަކުރާރުވިޔަ ނުދިނުމަށްޓަކައި، އަޅަންޖެހޭ ހުރިހާ ފިޔަވަޅުތަކެއް އެ ކުންފުނިން އަޅާނެ ކަމަށެވެ

"މީގެ އިތުރުން، މިފަދަ ހާދިސާއެއް ތަކުރާރުވިޔަ ނުދިނުމަށް ޓަކައި، އަޅަންޖެހޭ ހުރިހާ ފިޔަވަޅުތަކެއް މި ކުންފުނިން އަޅާނެ ކަމުގެ ފުރިހަމަ ޔަގީންކަން އަރުވަން. އަދި މީގެ ސަބަބުން ރައްޔިތުންނަށް ކުރިމަތިވި އުނދަގޫތަކަށް މައާފަށް އެދެން،" ފަހުމީ ވިދާޅުވި އެވެ.

މުޅި މާލޭ ސަރަހައްދުން މިއަދު ގާތްގަނޑަކަށް ފަސް ގަޑިއިރަށް ކަރަންޓު ކެނޑިފައިވާއިރު، ފަހުމީ ވިދާޅުވީ އެ މައްސަލަ ދިމާވާން މެދުވެރިވި ސަބަބު ދެނަގަނެ އެ މައުލޫމާތު ފަހުން އާންމު ކުރާނެ ކަމުގެ ޔަގީންކަން ދެއްވާ ކަމަށެވެ.

ސްޓެލްކޯއިން މިއަދު ނޫސްވެރިންނަށް މައުލޫމު ދެމުން ބުނީ ކަރަންޓު ކެނޑެން ދިމާވި ސަބަބު އަދި މިހާތަނަށް ދެނެގަނެވިފައިނުވާ ކަމަށެވެ. އަދި އެއްވެސް އިކުއިޕްމަންޓަކަށް ނުވަތަ ގްރިޑުގެ ބަޔަކަށް ވެސް ގެއްލުމެއް ލިބިފައިކަން އަދި މިހާތަނަށް ބެލި ބެލުމުން އެނގިފައިނުވާ ކަމަށް އެ ކުންފުނިން ބުނެފައިވެ އެވެ.