18 އަހަރުން މަތީގެ އެންމެންނަށް ބޯހިޔާވަހިކަން ލިބޭނެ ކަމުގެ ލިޔުން މިއަހަރު ދޭނަން: ރައީސް

މާލޭ ރައްޔިތުންގެ ތެރެއިން އުމުރުން 18 އަހަރުވެފައިވާ އެންމެންނަށް ގްރޭޓާ މާލެ ސަރަހައްދުން ގޯތި ނުވަތަ ފުލެޓް ދޫކުރުމުގެ މަސައްކަތް މި އަހަރު ފަށާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ޕީއެސްއެމް އަށް ދެއްވި އިންޓަވިއެއްގައި ރައީސް މުއިއްޒު ވިދާޅުވީ އެކި މަޝްރޫއުތަކުގެ ދަށުން ގިރާވަރުފަޅާއި، ގުޅީފަޅު ހިމެނޭހެން، ގްރޭޓާ މާލެ ސަރަހައްދުން ގޯއްޗާއި ފުލެޓް، މި ދައުރުގެ ތެރޭގައި ދޫކުރައްވާނެ ކަމަށެވެ. އެގޮތުން މާލެ ސަރަހައްދަށް އެކަނި، 4000 ފުލެޓް އެކަށައެޅިފައިވާ ކަމަށާއި މީގެ ސަބަބުން މިސަރަހައްދުގައި ޒަމާން ތަކަކަށް ދެމިގެންދިޔަ ބޯހިޔާވަހި ކަމުގެ މައްސަލަ އަށް އެކަށީގެންވާ ހައްލެއް ލިބިގެންދާނޭ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ 18 އަހަރުވެފައިވާ މާލޭގެ ރައްޔިތުންނާއި މާލޭގެ ރަށްވެހިންނަށް މާލެ ސަރަހައްދުން ގޯތި ނުވަތަ ފުލެޓް، ކަށަވަރުކޮށް ދިނުމުގެ މަސައްކަތް މި އަހަރު ފެށިގެންދާނެ ކަމަށެވެ. އަދި، މިކަމަށް އެދޭ، ޝަރުތު ހަމަވާ ފަރާތްތަކަށް މި އަހަރު ނިމުމުގެ ކުރިން ގޯތި ނުވަތަ ފުލެޓް ހަވާލު ކުރެވޭ ކަމުގެ ލިޔުން ދިނުމަކީ ސަރުކާރުގެ އަމާޒުކަމަށް ވެސް އެ މަނިކުފާނު ވިދާޅުވި އެވެ.

މީގެ އިތުރުން، ރާއްޖޭގެ 57 ރަށެއްގައި ކޮންޓްރެކްޓާ ފައިނޭންސިން އުސޫލުގެ ދަށުން ނުވަތަ ދައުލަތުގެ ބަޖެޓުގެ ތެރެއިން، ގެދޮރުވެރި ކަމުގެ މަޝްރޫއުތައް ކުރިއަށް ގެންދެވޭނެ ކަމަށް ވެސް އެ މަނިކުފާނު ވިދާޅުވި އެވެ.

އެ މަނިކުފާނު ވައުދުވެވަޑައިގެންފައިވާ ގޮތަށް، ފުލެޓް ގެއްލުނު ފަރާތްތަކަށް، މި ސަރުކާރުގެ ފުރަތަމަ ގެދޮރުވެރި ކަމުގެ މަޝްރޫއުގެ ދަށުން ފުލެޓް ހަވާލު ކުރެވޭނެ ކަމަށާއި އަދި، މިއަށް އޮތް ހަމައެކަނި އިސްތިސްނާއަކީ އެހެން ސްކީމެއްގެ ދަށުން ގެދޮރު ކަށަވަރުވެފައިވުން ކަމަށް ރައީސް މުއިއްޒު ވެސް ވިދާޅުވި އެވެ.