ގަވާއިދާ ހިލާފަށް އުޅުނު 25 ބިދޭސީއަކު އަތުލައިގެންފި

އިމިގްރޭޝަނާއި ފުލުހުން ގުޅިގެން ހިންގި އޮޕަރޭޝަނެއްގެ ތެރެއިން -- ފޮޓޯ/ އިމިގްރޭޝަން

މާލޭގައި ގަވާއިދާ ހިލާފަށް އުޅެމުންދިޔަ ބިދޭސީންތަކެއް އިމިގްރޭޝަނުން އަތުލައިގެންފި އެވެ.

އިމިގްރޭޝަނުން ބުނީ ގަވާއިދާ ހިލާފަށް އުޅޭ ބިދޭސީން ހޯދުމަށް ޓާސްކުފޯހުން ކުރިއަށްގެންދާ އޮޕަރޭޝަންތަކުގެ ދަށުން، މި މަހުގެ 29 ވަނަ ދުވަހުގެ ރޭ މާލޭގެ 2 ތަނެއް ބަލައި ފާސްކޮށްފައިވާ ކަމަށާއި އެ އޮޕަރޭޝަންގައި ޖުމުލަ 102 ބިދޭސީން ޗެކުކޮށްފައިވާ ކަމަށެވެ.

އެ ގޮތުން ހެންވޭރުގައި ހުންނަ ގެއަކުން 7 ބިދޭސީންނާއި، މާފަންނު ހަވީރީ ގޯޅީގައި ހުންނަ ބިދޭސީން ދިރިއުޅެމުންދިޔަ ތަނަކުން 18 ބިދޭސީންނާ އެކު ޖުމުލަ 25 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެންގޮސްފަ އެވެ.

ރާއްޖޭގައި ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅެމުންދާ ބިދޭސީން ދެނެގަތުމުގެ ހާއްސަ އޮޕަރޭޝަނެއް ހޯމް މިނިސްޓްރީ އާއި މޯލްޑިވްސް އިމިގްރޭޝަން އަދި ފުލުހުން ގުޅިގެން ދަނީ ހިންގަމުންނެވެ. އަދި ރާއްޖޭގެ ގާނޫނު ތަކާއި ހިލާފަށް ވިޔަފާރި ތަކުގެ ތެރޭގައްޔާއި އެހެނިހެން ކަންކަމުގައި ހަރަކާތްތެރި ވަމުންދާ ބިދޭސީންނަށް އިތުރު ފުރުސަތެއް ދިނުމެއް ނެތި ޑީޕޯޓު ކުރުމުގެ މަސައްކަތް ވެސް ގެންދަނީ ކުރަމުންނެވެ.

އެ ގޮތުން މިހާތަނަށް 7000 އަށްވުރެ ގިނަ ބިދޭސީން ވަނީ އަނބުރާ އެމީހުން ނިސްބަތްވާ ގައުމު ތަކަށް ފޮނުވާފަ އެވެ.

އިމިގްރޭޝަން