ދިވެހި ވަތަނީ ހިދުމަތުގެ މުދައްރިބުންނާ ރައީސް މުއިއްޒު ބައްދަލު ކުރައްވައިފި

ރައީސް ޑރ. މުޙައްމަދު މުއިއްޒު، ދިވެހި ވަތަނީ ހިދުމަތުގެ މުދައްރިބުންނާ މިއަދު ބައްދަލު ކުރައްވައިފި އެވެ.

ބަންޑާރަކޮށީގައި މިއަދު ބޭއްވި އެ ބައްދަލު ކުރެއްވުމުގައި މުދައްރިބުންގެ ކިބައިން ރައީސް އެދިވަޑައިގަތީ ދިވެހި ވަތަނީ ހިދުމަތަކީ ހަރުދަނާ ޒުވާން ޖީލެއް ބިނާ ކުރުމަށް ޓަކައި ރާއްޖޭގައި މުޅިން އަލަށް ފަށާ ކަމަކަށް ވުމާ އެކު، މި ކަމުގައި ވިސްނުންތެރިކަމާއި ހިކުމަތްތެރިކަމާ އެކު މަސައްކަތް ކޮށްދެއްވައި، ބެލެނިވެރިންނާއި ރައްޔިތުން އުންމީދު ކުރާ ފަދަ ހަރުދަނާ ބައެއްގެ ގޮތުގައި ބައިވެރިން ތަމްރީން ކޮށް ދެއްވުމަށެވެ.

އެ މަނިކުފާނުގެ ވާހަކަފުޅުގައި ދިވެހި ވަތަނީ ހިދުމަތުގައި ބައިވެރިވާ ޒުވާނުންނަކީ، އިސްލާމް ދީނަށް ލޯބިކުރާ، ދީނީ ކަންކަމަށް ފަރުވާތެރި، ގައުމިއްޔަތުގެ ވިސްނުން ހުރި، ގައުމަށް ބޭނުންތެރި، ރިވެތި އަހުލާގާއި ސުލޫކުގެ ވެރި ބައެއްގެ ގޮތުގައި ތަމްރީނު ކޮށްދެއްވުމަށް ވެސް އެދިވަޑައިގަތެވެ.

އެއްވެސް އިޝްތިހާރު ކުރުމެއް ނެތިވެސް، މި ޕްރޮގްރާމަށް މިހާތަނަށް 900 އާ ގާތް ކުރާ އަދަދަކަށް، ޒުވާނުން ކުރިމަތިލާފައި ވާއިރު، މިއީ، މި ފަދަ ޕްރޮގްރާމަކަށް ބެލެނިވެރިން ބޭނުންވެފައިވާ މިންވަރާއި ޒުވާނުންގެ މެދުގައި މި ޕްރޮގްރާމަށް އޮތް ތާއީދުގެ ގޮތުގައި ދެކެވަޑައިގަންނަވާ ކަމަށް ރައީސް ވިދާޅުވި އެވެ.

ހަމަ މި ފަދައިން، ދިވެހި ވަތަނީ ހިދުމަތަކީ ދިވެހީން ބަލައިގަންނަ، ދިވެހި ޒުވާނުންގެ މެދުގައި މަގުބޫލު، ނަމޫނާ ހަރަކާތެއްގެ ގޮތުގައި ތަރައްގީ ކުރެވިގެންދިއުމަށް ނުހަނު ބޭނުންފުޅުވާކަން ރައީސްގެ ވާހަކަފުޅުގައި ފާހަގަ ކުރައްވައި، ޕްރޮގްރާމްގެ ބައިވެރިންނާއި ބެލެނިވެރިން، މި ޕްރޮގްރާމަށް ކުރާ އުންމީދު ހާސިލު ވާނެހެން މި ޕްރޮގްރާމް ކުރިއަށް ގެންގޮސްދެއްވުމަށް މުދައްރިބުންގެ ކިބައިން ރައީސް އެދިވަޑައިގަތެވެ.

ދިވެހި ވަތަނީ ހިދުމަތުގެ މަގުސަދު ތަކުގެ ތެރޭގައި، ދިވެހި ޒުވާނުންގެ މެދުގައި ގައުމިއްޔަތުގެ ރޫހާއި ފަހުރު ދިރުވައި އާލާކޮށް، އިސްލާމްދީނަށް ލޯބިކުރާ ރައްޔިތެއް ގައުމުގައި ބިނާ ކުރުމާއި، ރާއްޖެއަށް ކުރިމަތިވާ ބޮޑެތި ނުރައްކާ ތަކާއި ކާރިސާތަކުގައި ގައުމީ ހިދުމަތަށް ސާބިތުކަމާ އެކު ކުރިމަތިލާނެ ރައްޔިތެއް ބިނާކޮށް ތަރައްގީ ކުރުން ހިމެނެ އެވެ.

އޭގެ އިތުރުން ދިވެހި ޒުވާނުންނަކީ އެއްބައެއްވަންތަ ކަމާ އެކު ގުޅިގެން މަސައްކަތް ކުރުމުގެ ސިފަ އަށަގަނެފައިވާ، އަހުލާގާއި ސުލޫކު ރަނގަޅު، އިހުތިރާމު ކުރާ، އަމަލާއި ބަހުގައި ކެތްތެރި ބައެއްގެ ގޮތުގައި ބިނާ ކުރުމާއި، ދިވެހި ޒުވާނުންނަކީ ދިރިއުޅުމުގެ މައިދާނުގައި ބޭނުންވާ ހުނަރުތައް ދަސްވެފައިވާ އުފެއްދުންތެރި އަދި ޒިންމާދާރު ރައްޔިތެއްގެ ގޮތުގައި ބައްޓަން ކުރުމަކީ ވެސް މަގުސަދެކެވެ.