ތިމާވެއްޓާ ރައްޓެހި ސިޓީއެއް އުފެއްދުމުގެ ހިޔާލު ރައީސް ހުށަހަޅުއްވައިފި

ސިންގަޕޫރުގެ ސަފީރު ރައީސްގެ އަރިހަށް އިހުތިރާމްގެ ޒިޔާރަތެއް ކުރެއްވުން – ފޮޓޯ/ ރައީސް އޮފީސް

އިޔާދަކުރަނިވި ހަކަތައިން ހިންގައި، ތިމާވެއްޓާ ރައްޓެހި ސިޓީއެއް އުފެއްދެވުމުގެ ހިޔާލު، ރައީސް ޑރ. މުޙައްމަދު މުއިއްޒު، ސިންގަޕޫރުން ރާއްޖެއަށް ކަނޑައަޅުއްވާފައި ހުންނަވާ ނޮން-ރެޒިޑެންޓް ހައިކޮމިޝަނަރު ސޫ ކޮކް ލެން، އަށް އަރުއްވައިފި އެވެ.

މި ހިޔާލު އެރުވީ ރައީސްގެ އަރިހަށް ހައިކޮމިޝަނަރު ކުރެއްވި އިހުތިރާމްގެ ޒިޔާރަތުގައި ދެއްކެވި ވާހަކަފުޅުގެ ތެރެއިންނެވެ.

ރައީސުލްޖުމްހޫރިއްޔާގެ އޮފީހުގައި މިއަދު ހެނދުނު ކުރިއަށް ގެންދިޔަ މި ބައްދަލު ކުރެއްވުމުގައި، މަތީ ތައުލީމާއި، ސިއްހީ ހިދުމަތާއި، ފަތުރުވެރިކަން ފަދަ ދާއިރާ ތަކުން ގުޅުން ބަދަހި ކުރުމާ ބެހޭ ގޮތުން ރައީސް އާއި ސަފީރު ވަނީ ބިނާ ކުރަނިވި މަޝްވަރާ ތަކެއް ކުރައްވާފަ އެވެ.

މި ބައްދަލު ކުރެއްވުމުގައި ރައީސް ދެއްކެވި ވާހަކަފުޅުގައި، ވިޔަފާރިއާއި، އިގުތިސާދާއި، ބޯހިޔާވަހި ކަމުގެ ދާއިރާއިން ރާއްޖޭގައި ވުނަ ކުރުމަށް ހިތްވަރު ދެއްވައި އެ ކަމުގެ ޝައުގުވެރިކަން ފައުޅު ކުރެއްވި އެވެ.

އަދި ބޯހިޔާވަހިކަމުގެ ސިނާއަތުގައި ފަންނީ އެހީތެރިކަން ފޯރުކޮށްދިނުމުގެ މުހިންމު ކަމުގެ މައްޗަށް އަލިއަޅުއްވާލައްވައި، އިޔާދަ ކުރަނިވި ހަކަތައިން ހިންގާ، ތިމާވެއްޓާ ރައްޓެހި ސިޓީއެއް އުފެއްދެވުމުގެ ހިޔާލު ރައީސް ހުށަހެޅުއްވި އެވެ.

މި ބައްދަލު ކުރެއްވުން ނިންމަވާލައްވާފައި ވަނީ، ސިޔާސީ ގުޅުންތައް ހަރުދަނާ ކުރުމާއި ދެ ފަރާތުގެ މަސްލަހަތު ހުރި ކަން ކަމުގައި އިސްތިރާޖީ އެއްބާރުލުން އިތުރު ކުރައްވައި، ދޭދޭ ގުޅުން އިތުރަށް ބަދަހި ކުރެއްވުމަށް މަސައްކަތް ކުރައްވާނެ ކަމުގެ ޔަގީންކަން ދެއްވަމުންނެވެ.

ރައީސް ޑރ މުޢިއްޒު