ހުޅަނގު މޫސުން ފެށިއްޖެ، ކުރިއަށް އޮތީ ވިއްސާރަ ދުވަސްތަކެއް

ކަނޑު ގަދަ ދުވަހެއްގައި ދެ ދޯނި ދަތުރު ކުރަނީ -- ފޮޓޯ/ ޕޮލިސް

ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވާނެ ކަމަށް ބެލެވޭތީ، ކުރިއަށް އޮތީ ވިއްސާރަ ދުވަސްތަކެއް ކަމަށް މޫސުމާ ބެހޭ ގައުމީ އިދާރާއިން ބުނެފި އެވެ.

މެޓުން ބުނީ މިއަދުން ފެށިގެން މި މަހުގެ 31 ވަނަ ދުވަހުގެ ނިޔަލަށް އުތުރާއި މެދު ރާއްޖެތެރޭގެ ބައެއް އަތޮޅުތަކަށް ވައިގަދަވެ، ކަނޑުތައް ގަދަވެ އުދަ އަރާފާނެ ކަމަށް ލަފާ ކުރެވޭ ކަމަށެވެ.

އަދި އެ ސަރަހައްދުގެ ބައެއް ރަށްރަށަށް ވިއްސާރަކޮށް، ގުގުރުން އެކަށީގެންވާ ކަމަށް މެޓުން ބުންޏެވެ.

އެ އިދާރާއިން ވަނީ ވައިގަދަވެ، ކަނޑުތައް ގަދަވާނެ ކަމަށް ލަފާ ކުރެވޭތީ ހުރިހާ ފަރާތްތަކުން، ހާއްސަކޮށް ކަނޑުދަތުރުކުރާ ފަރާތްތަކުން ދަތުރަށް ފެށުމުގެ ކުރިން މޫސުމާބެހޭ އެންމެ ފަހުގެ މައުލޫމާތު ހޯދުމަށް އިލްތިމާސްކޮށްފަ އެވެ.

މި އަހަރުގެ ހުޅަނގު މޫސުން ދެކުނުގެ އަތޮޅު ތަކަށް ފެށިފައި ވަނީ މި މަހުގެ ހަތް ވަނަ ދުވަހު އެވެ. މެދު ރާއްޖެތެރެއަށް މި މަހުގެ 12 ވަނަ ދުވަހު ހުޅަނގު މޫސުން ފެށިފައިވާއިރު، ރާއްޖޭގެ އެންމެ އުތުރަށް ހުޅަނގު މޫސުން ފެށުނީ މި މަހުގެ 21 ވަނަ ދުވަހު އެވެ.

މެޓް އޮފީސް