ހުޅުމާލެ ހޮސްޕިޓަލުގެ އީއާރުގެ ހިދުމަތް ފުޅާ ކުރުމުގެ މަޝްރޫއުގެ ނިންމުން ރައީސް ޝަރަފުވެރިކޮށްދެއްވައިފި

މި ސަރުކާރުގެ "ނިއު ޕޮލިސީ އިނިޝިއޭޓިވް"ގެ ދަށުން ކުރިއަށްގެންދިޔަ، ހުޅުމާލެ ހޮސްޕިޓަލުގެ އިމަޖެންސީ ރޫމުގެ ހިދުމަތް ފުޅާކުރުމުގެ މަޝްރޫއު ނިންމުމުގެ ރަސްމިއްޔާތު ރައީސް ޑރ. މުޙައްމަދު މުއިއްޒު، ޝަރަފުވެރިކޮށްދެއްވައިފި އެވެ.

މިއަދު ހަވީރު ހުޅުމާލެ ހޮސްޕިޓަލުގައި ކުރިއަށްދިޔަ މި ރަސްމިއްޔާތުގައި ރައީސް ވަނީ ހުޅުމާލެ ހޮސްޕިޓަލުގެ އިމަޖެންސީ ރޫމު ބައްލަވާލައްވާފަ އެވެ. އަދި އެވަގުތު ހިދުމަތް ހޯދަމުންދިޔަ ފާރާތްތަކާއި އެ ހޮސްޕިޓަލުގެ މުވައްޒަފުންނާ ބައްދަލުކުރައްވާ ވާހަކަފުޅު ދެއްކެވި އެވެ.

ޒަމާނީ މެޑިކަލް އާލާތްތަކާ އެކު ފަރުމާކޮށްފައިވާ މި އިމަޖެންސީ ރޫމުގައި، ކްރިޓިކަލް ބަލިމީހުންނަށް ހާއްސަ ފަރުވާ ދިނުމަށް ރިސަސިޓޭޝަން ރޫމެއްވެސް ގާއިމު ކޮށްފައިވެ އެވެ. އަދި ފުރާނައަށް ނުރައްކާވާ ހާލަތުގައި އަވަސް ފަރުވާ ދެވޭ އެންމެ ފުރިހަމަ އާލާތްތަކާ އެކު، މި ރޫމް ތައްޔާރު ކޮށްފައި ވަނީ ބޮޑެތި އިމަޖެންސީ ހާލަތްތަކަށް ހާއްސަ އިސްކަމެއް ދީގެންނެވެ.

އިމަޖެންސީ ރޫމުގެ ހިދުމަތް ފުޅާ ކުރުމުގެ މަޝްރޫއަކީ ސަރުކާރުން ކަނޑައަޅާފައިވާ ސިއްހީ ސިޔާސަތު ތަކުގެ ތެރެއިން، ހުޅުމާލެ ހޮސްޕިޓަލް އިތުރަށް ތަރައްގީކޮށް، މާލެ ސަރަހައްދުގައި ދިރިއުޅޭ ރައްޔިތުންނަށް ފުރިހަމަ ސިއްހީ ހިދުމަތް ތަކެއް ފޯރުކޮށްދިނުމަށް ކުރިއަށްގެންދިޔަ މަޝްރޫއެކެވެ.

މި މަޝްރޫއު ނިމުމާ އެކު، ހުޅުމާލެ ހޮސްޕިޓަލްގެ އެމަޖެންސީ ރޫމުގައި ފަރުވާދޭ އެނދު ތަކުގެ އަދަދު ވަނީ ދެގުނަ ވެފަ އެވެ. މި މަޝްރޫއަށް ފަހު ހުޅުމާލެ ހޮސްޕިޓަލުގެ އެމަޖެންސީ ރޫމުގައި މިހާރު އެއްފަހަރާ 14 އެނދުގައި ބަލި މީހުން އެޑްމިޓް ކޮށްގެން ފަރުވާ ދިނުމުގެ ގާބިލުކަން ހުންނާނެ އެވެ.

މި ސަރުކާރުން އަންނަނީ ފެންވަރު ރަނގަޅު ސިއްހީ ފަރުވާ ފަހިކޮށްދިނުމަށް ގިނަ މަސައްކަތްތަކެއް ކުރަމުންނެވެ.