މިއަދަކީ ދިވެހި ހައްޖުވެރީންނަށް ތާރީހީ، އުފާވެރި ދުވަހެއް: ރައީސް

މިއަދަކީ ދިވެހި ހައްޖުވެރީންނަށް ތާރީހީ އަދި އެހާމެ އުފާވެރި ދުވަހެއް ކަމަށް ރައީސުލްޖުމުހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެ މަނިކުފާނު މިހެން ވިދާޅުވީ، މައްކާ ރޫޓު އިނީޝިއޭޓިވް ރަސްމީކޮށް އިފުތިތާހު ކުރުމަށް މިއަދު ބޭއްވި ހާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސްގެ ވާހަފުޅުގައި ވަނީ މައްކާ ރޫޓު އިނީޝިއޭޓިވްގައި ރާއްޖެ ހިމެނުއްވީތީ ސައުދީ ރަސްގެފާނު ސަލްމާން ބިން އަބްދުލްއަޒީޒްއަށާއި ޕްރިންސް މުޙައްމަދު ބިން ސަލްމާނަށް ޝުކުރު އަދާ ކުރައްވާފަ އެވެ. އަދި މިކަމުން އެނގިގެން ދަނީ ރާއްޖެ އާއި ސައުދީ އާ ދެމެދު އޮތް ދުވަސްވީ ގާތް ގުޅުން ކަމަށާއި މިއީ ދިވެހީންނަށް ލިބުނު ވަރަށް ބޮޑު އުފަލެއް ކަމަށް ވެސް އެމަނިކުފާނު ވިދާޅުވި އެވެ.

ރައީސްގެ ވިދާޅުވީ، ސައުދީ ސަރުކާރުން ދިވެހި ހައްޖުވެރީންނަށް ހަމަޖައްސައިދީފައިވާ އިންތިޒާމު ތަކަކީ ވަރަށް ފުރިހަމަ އިންތިޒާމު ތަކެއް ކަމަށާއި މި އިންތިޒާމުތައް ހަމަޖެއްސުމަށް މަސައްކަތް ކުރައްވާ ސައުދީ ހައްޖު މިނިސްޓްރީއަށާއި، މައްކާ ރޫޓު އިނީޝިއޭޓިވްގެ އިސް ބޭފުޅުންނަށާއި ސައުދީ އިންޓީރިއާ މިނިސްޓްރީގެ އިތުރުން ރާއްޖޭގައި ހުންނަ ސައުދީ އެމްބަސީގެ އިސްވެރީންނަށް ޝުކުރު އަދާ ކުރައްވާ ކަމަށެވެ.

އަދި ދިވެހި ހައްޖުވެރީންނަށް ހިދުމަތް ދިނުމަށާއި ހައްޖު ވެރީންގެ ހިދުމަތުގައި މިހާރު ވެސް ދިވެހި ހައްޖު މިޝަނުން ސައުދީގައި ހަރަކާތްތެރި ވަމުން އަންނަކަން ރައީސް ފާހަގަ ކުރެއްވި އެވެ.

އެގޮތުން ހައްޖުވެރީންނަށް ދެމުންދާ ހިދުމަތްތައް އިތުރަށް ފުރިހަމަ ކުރުމަށް ކުރަމުން އަންނަ މަސައްކަތުގެ ދަށުން ސައުދީގެ ކަމާބެހޭ އިދާރާ ތަކާއި ގުޅިގެން ފުރަތަމަ ފަހަރަށް ދިވެހި ހައްޖުވެރީންނަށް ހާއްސަ ކުލިނިކެއް ވެސް މިހާރު ގާއިމު ކުރެވިފައިވާ ކަމަށް ރައީސް ވިދާޅުވި އެވެ.

މީގެ އިތުރުން، ހައްޖުވެރީންނަށް ދެމުންދާ ހިދުމަތްތަކުގެ ފެންވަރު ރަނގަޅު ކުރުމަށް ސައުދީ ސަރުކާރުން ކުރަމުން އަންނަ މަސައްކަތް ފާހަގަ ކުރައްވާ ރައީސް ވިދާޅުވީ އެއީ މުޅި އިސްލާމީ އުއްމަތަށް އެ ގައުމުން ދޭ ފުރިހަމަ ހިދުމަތެއް ކަމަށެވެ.

މައްކާ ރޫޓު އިނީޝިއޭޓިވް މިއަދު އިފުތިތާހު ކޮށްދެއްވީ ރައީސުލްޖުމުހޫރިއްޔާ ޑރ. މުޙައްމަދު މުއިއްޒުގެ ދެކަނބަލުންނެވެ.