އދ. އިން ރާއްޖެއަށް ފުރަތަމަ ފަހަރަށް ރެޒިޑެންޓް ކޯޑިނޭޓަރެއް

އދ. އިން ރާއްޖެއަށް އަލަށް ކަނޑައެޅުއްވި ރެޒިޑެންޓް ކޯޑިނޭޓަރު، ހައޯ ޖަންގް އެ މަނިކުފާނުގެ މަގާމުގެ ފަތްކޮޅު، ރައީސް ޑރ. މުޙައްމަދު މުއިއްޒުއަށް މިއަދު އަރުވައިފި އެވެ.

ފަތްކޮޅު އެރުވުމުގެ ރަސްމިއްޔާތަށް ޖުމްހޫރީ މައިދާނުން ފެށިގެން ރައީސުލްޖުމްހޫރިއްޔާގެ އޮފީހާ ހަމައަށް، ހައޯ ޖަންގް މިއަދު ހެނދުނު ވަޑައިގެންނެވީ ހަތްކޮޅުގައި ރަސްމީ އިއްޒަތުގައި، ބެރު ދުންމާރި ތާޅަފިލީގައި، ހެވިކަމުގެ ލަޝްކަރީންނާއެކު ހިންގަވައިފަ އެވެ.

އދ. އިން ރާއްޖެއަށް އަލަށް ކަނޑައެޅުއްވި ރެޒިޑެންޓް ކޯޑިނޭޓަރު، އެމަނިކުފާނުގެ މަގާމުގެ ފަތްކޮޅު ރައީސަށް އެރުވުމުން ރައީސް ވަނީ އެ މަނިކުފާނަށް ތަހުނިޔާ ވިދާޅުވެ، ރާއްޖެއަށް ވަޑައިގެންނެވި ކަމަށް ޓަކައި މަރުހަބާ ވިދާޅުވެފަ އެވެ.

އެއަށްފަހު ރައީސް ވަނީ ސިއްހީ ދާއިރާއާއި، ތައުލީމީ ދާއިރާ އަދި އިންސާނީ ވަސީލަތް ގާއިމު ކުރުން ފަދަ ކަންކަމުގައި އދ. އިން އަދާކުރާ މުހިންމު ދައުރުގެ މައްޗަށް އަލިއަޅުއްވާލައްވާފައެވެ. އަދި އެ މަނިކުފާނުގެ ވާހަކަފުޅުގައި ވަނީ 2040 ވަނަ އަހަރުގެ ނިޔަލަށް ރާއްޖެ އަކީ ތަރައްގީ ވެފައިވާ ގައުމަކަށް ހެދުމަށް ކަނޑައަޅާފައިވާ އަމާޒަށް ވާސިލު ވުމުގައި އދ.ގެ ބައިވެރިވުން ދެމެހެއްޓުމުގެ މުހިންމުކަން ފާހަގަ ކުރައްވާފަ އެވެ.

ހަމައެއާ އެކު ދުންފަތުގެ ޖެނެރޭޝަނަލް ބޭން ކަނޑައަޅުއްވައި، ދުންފަތް ކޮންޓްރޯލު ކުރުމާ ބެހޭ ގާނޫނަށް 2 ވަނަ އިސްލާހު ގެނައުމުގެ ބިލު ތަންފީޒުކޮށް، ރައްޔިތުންގެ ނަފުސާނީ ދުޅަހެޔޮކަން އިތުރު ކުރުމަށް ކުރެވޭ މަސައްކަތްތަކުގައި އދ.ގެ ފުރިހަމަ އެއްބާރުން ދެއްވާނެ ކަމަށް ގަބޫލުފުޅު ކުރައްވާ ކަމަށް ވެސް އެ މަނިކުފާނު ވިދާޅުވި އެވެ.

މި އަހަރަކީ ރާއްޖެ އދ.ގެ މެންބަރަކަށް ވިތާ 60 އަހަރު ފުރޭ އަހަރެވެ.