އަންނަ އަހަރަކީ އުފެއްދުންތެރިކަމުގެ އަހަރެއްގެ ގޮތުގައި ކަނޑައެޅުމުގެ މަސައްކަތް އެބަ ކުރަން: ރައީސް

އަންނަ އަހަރަކީ ގައުމީ އުފެއްދުންތެރިކަމުގެ އަހަރެއްގެ ގޮތުގައި ކަނޑައެޅުމުގެ މަސައްކަތް ކުރައްވާ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ދިވެހީންގެ އުފެއްދުންތެރިކަމުގެ މައުރަޒަށް ކުރެއްވި ދެވަނަ ޒިޔާރަތުގައި ދައުލަތުގެ މީޑިއާއަށް ދެއްވި އިންޓަވިއުއެއްގައި ރައީސް ވިދާޅުވީ އެކަން ކުރައްވާނީ މަޝްވަރާ ކުރައްވައި، ޕްލޭން ކަނޑައަޅުއްވައިގެން ވަށާޖެހޭ ގޮތެއްގައި ކަމަށެވެ.

ރައީސް ވިދާޅުވީ މިއަންނަ އަހަރަށް ބަހާލައިގެން އުފެއްދުންތެރިކަމަށް ފުޅާދާއިރާއެއްގައި ފުރުސަތު ފަހިކޮށްދިނުމަށް މަސައްކަތް ކުރައްވާނެ ކަމަށެވެ.

އަދި 2030 ވަނަ އަހަރަށް ދާއިރު މުޅި ޖީޑީޕީގެ 15 އިންސައްތަ އާމްދަނީ، ކްރިއޭޓިވް އިންޑަސްޓްރީން ލިބޭ މިންވަރަށް އެ ސިނާއަތް ފުޅާ ކުރުމަށް ނިންމަވާފައިވާކަން އެ މަނިކުފާނު ވަނީ އިއުލާން ކުރައްވާފަ އެވެ.

އަމިއްލަ އުފެއްދުންތެރިކަން ދެއްކުމުގެ ފުރުސަތު ސަރުކާރުން ފަހި ކޮށްދެއްވާނެކަން ހާމަ ކުރައްވަމުން ރައީސް ވިދާޅުވީ، ޑިޖިޓަލައިޒްކޮށް ތަކެތި އެކި ކަންކޮޅު ތަކަށް ފޯރުކޮށްދެވި، އެއިން މަންފާ ލިބޭނެ މަގުފަހިކޮށްދިނުމަށް ސަރުކާރުން އެހީތެރިކަން ފޯރުކޮށްދޭނެ ކަމަށެވެ. އަދި އެ މަނިކުފާނުގެ ވާހަކަފުޅުގައި، މި އަހަރު މިބާއްވާ ދިވެހީންގެ އުފެއްދުންތެރިކަމުގެ މައުރަޒަކީ ވަރަށް ކާމިޔާބު މައުރަޒެއް ކަމުގައި ވިދާޅުވި އެވެ.

މި މައުރަޒުގެ މަގުސަދަކީ ދިވެހި އުފެއްދުންތެރިކަމަށް ފުރުސަތު ދިނުން ކަމުގައި ފާހަގަ ކުރައްވައި މިކަން ހާސިލްވެފައިވާ ކަމަށް ރައީސް ވިދާޅުވި އެވެ. އަދި ވަރަށް ބޮޑު މެދުކެނޑުމަކަށްފަހު، އަލުން މައުރަޒު ހުޅުވާލުމަކީ ފެށުމެއް ކަމަށް ވިދާޅުވެ މި ފެށުން ރައްޔިތުން ބަލައިގެންފައިވާ މިންވަރު، މައުރަޒަށް ޒިޔާރަތް ކުރެއްވުމުން ފެނިވަޑައިގަންނަވާނެ ކަމުގައި އެ މަނިކުފާނު ވިދާޅުވި އެވެ.

ރައީސްގެ ވާހަކަފުޅުގައި އެ މަނިކުފާނު ވަނީ، އަމިއްލަ ފަރުދުންގެ އުފެއްދުންތެރިކަން ކުރިއެރުވުމަށް ސަރުކާރުން އެއްބާރުލުން ދޭނެކަން ހާމަކުރައްވާފަ އެވެ. އަދި އަމިއްލަ މުއްސަދިކަމާ، މުޅި ގައުމުގެ މުއްސަދިކަން ހާސިލު ކުރުމަށް އެންމެން ގުޅިގެން އެކުގައި ކުރިއަށްދާން ބޭނުންފުޅުވާކަން އެ މަނިކުފާނު ފާހަގަ ކުރެއްވި އެވެ.