މޯލްޑިވްސް އެކްސްޕޯގެ އެސްއޯއީ ކެޓަގަރީ ސްޓެލްކޯއިން ކާމިޔާބުކޮށްފި

ދިވެހީންގެ އުފެއްދުންތެރިކަމުގެ މައުރަޒު 2025ގެ އެސްއޯއީ ކެޓަގަރީ ސްޓެލްކޯއިން ކާމިޔާބުކޮށްފި އެވެ.

ސޯޝަލް ސެންޓަރުގައި ރޭ ބޭއްވި އިނާމު ދިނުމުގެ ރަސްމިއްޔާތުގައި ރައީސުލްޖުމްހޫރިއްޔާގެ އަތްޕުޅުން ދެއްވި މި އިނާމާ ހަވާލުވީ އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ އެވެ.

އެކްސްޕޯގައި ސްޓެލްކޯއަށް ކާމިޔާބު ލިބުނު ދައްކާލުމުގައި ހިމެނޭ "ރީޖަނަލް ސްކާޑާ" ސިސްޓަމަކީ ސްޓެލްކޯއިން ކަރަންޓުގެ ހިދުމަތް ދޭ ރަށްރަށުގައި ހަކަތަ އުފެއްދުމާ ގުޅޭ ހުރިހާ ކަމެއް ބެލެހެއްޓުމަށް އެ ކުންފުނިން ތަރައްގީކޮށްފައިވާ ސިސްޓަމެކެވެ.

މި ސިސްޓަމްގެ އެހީގައި ޖެހޭ މައްސަލަތައް ފަސޭހަކަމާ އެކު ހައްލު ކުރެވި ކުއްލިއަކަށް ކަރަންޓުގެ ހިދުމަތް މެދުކެނޑުން މަދުކޮށް، އަދި މުސްތަގުބަލުގައި ހަކަތަ ބޭނުންވާނެ މިންވަރު ދެނެގަނެ ޕްލޭން ކުރަން ފަސޭހަވެގެން ދާނެ އެވެ.

"އަޅުގަނޑުމެންގެ ކާމިޔާބު ޓީމަށް ބޮޑު މަރުހަބާއަކާއި މި ކާމިޔާބީ ހާސިލު ކުރުމަށް މެދުވެރިވި ސްޓެލްކޯގެ އެންމެހާ ހީވާގި އަދި އިހުލާސްތެރި މުވައްޒަފުންނަށް ހިތުގެ އެންމެ ފުންމިނުން ޝުކުރު ދަންނަވަން،" ސްޓެލްކޯއިން ކުރި އެކްސް ޕޯސްޓެއްގައި ބުންޏެވެ.

ހުޅުމާލޭ ސެންޓްރަލް ޕާކުގައި މި މައުރަޒު ކުރިއަށްދާނީ މިއަދުން ފަށައިގެން މި މަހުގެ ނިޔަލަށެވެ. މި މައުރަޒު އާންމުންނަށް ހުޅުވާލާނީ މިރޭ 8:30ގަ އެވެ.

ސްޓެލްކޯ