މާލޭގެ ޓްރެފިކް ހާލަތު ރަނގަޅު ކުރުމަށް މަޝްވަރާ ބައްދަލުވުމެއް

މާލޭގެ ޓްރެފިކް ހާލަތު ރަނގަޅު ކުރުމަށް އެޅިދާނެ ފިޔަވަޅުތަކާ ގުޅޭ ގޮތުން މާލެ ސިޓީ ކައުންސިލާއި ޓްރާންސްޕޯޓު މިނިސްޓްރީއާ ދެމެދު މުހިންމު މަޝްވަރާ ބައްދަލުވުމެއް ބާއްވައިފި އެވެ.

ކައުންސިލްގެ ފަރާތުން ބައިވެރިވެ ވަޑައިގަތީ މޭޔަރު އާދަމް އާޒިމާއި ޑެޕިއުޓީ މޭޔަރު މުޙައްމަދު އަރީޝްއެވެ. މިބޭފުޅުންގެ އިތުރުން މިނިސްޓްރީގެ އިސް ވެރިން ވެސް މި ބައްދަލުވުމުގައި ބައިވެރިވެ ވަޑައިގެންނެވި އެވެ.

ޓްރާންސްޕޯޓު މިނިސްޓްރީން ބުނީ ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވުނީ މާލޭގެ މަގު ތަކުގައި ދިމާވަމުންދާ ޓްރެފިކް ތޮއްޖެހުމުގެ މައްސަލަ ހައްލު ކުރުމަށް އެ މިނިސްޓްރީން ކުރިއަށްގެންދާ ދިރާސާއާ ގުޅޭ ގޮތުން ކަމަށެވެ.

މި ދިރާސާގެ މައިގަނޑު މަގުސަދު ތަކުގެ ތެރޭގައި ވެރިރަށް މާލޭގެ މަގު ތަކުގައި ޓްރެފިކް ޖެހުމުގެ އަސްލު ސަބަބުތައް ދެނެގަތުމާއި، މަގު ބޭނުން ކުރާ އެންމެހައި ފަރާތް ތަކަށް ދަތުރުފަތުރު ކުރުމުގައި ފަސޭހަ ކަމާއި ރައްކާތެރިކަން ލިބިދިނުމާއި، އަދި ދެމެހެއްޓެނިވި، ދިގު މުއްދަތުގެ ހައްލުތަކެއް ހޯދުން ހިމެނެ އެވެ.

މިނިސްޓްރީގެ ފަރާތުން މި ބައްދަލުވުމުގައި ފާހަގަ ކުރީ މި ދިރާސާގެ ނަތީޖާ ލިބުމުން، އެ ނަތީޖާއަށް ބިނާކޮށް އަވަސް ފިޔަވަޅު ތަކެއް އަޅާނެ ކަމަށެވެ. އަދި މި މަސައްކަތުގައި މާލެ ސިޓީ ކައުންސިލާއި އެހެނިހެން ކަމާބެހޭ އިދާރާ ތަކުގެ އެއްބާރުލުން ވަރަށް މުހިންމުކަން ވެސް ފާހަގަ ކުރެއްވި އެވެ.

ޓްރާންސްޕޯޓު މިނިސްޓްރީ މާލެ ސިޓީ ކައުންސިލް