މަގުމަތީގެ ރައްކާތެރިކަން ކަށަވަރު ކުރުމަކީ އެންމެންގެ ޒިންމާއެއް: ޑެޕިއުޓީ މޭޔަރު

މާލޭ ސިޓީގެ ޑެޕިއުޓީ މޭޔަރު މުޙައްމަދު އަރީޝް -- ފޮޓޯ/ ސިޓީ ކައުންސިލް

މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަކީ އެންމެންގެ ވެސް ޒިންމާއެއް ކަމަށް މާލޭ ސިޓީގެ ޑެޕިއުޓީ މޭޔަރު މުޙައްމަދު އަރީޝް ވިދާޅުވެއްޖެ އެވެ.

އަރީޝް މިހެން ވިދާޅުވިއިރު، އެކްސިޑެންޓުތައް މަދު ކުރުމަށް އެއްގަމު އުޅަނދުފަހަރު ދުއްވާއިރު، މަގުމަތީގެ ގަވާއިދު ތަކަށް ބޯލަނބައި އިތުރަށް ސަމާލުވުމަށް ފުލުހުން ވެސް އަންނަނީ ތަކުރާރުކޮށް އިލްތިމާސް ކުރަމުންނެވެ.

ޑެޕިއުޓީ މޭޔަރު، ފޭސްބުކުގައި ހިއްސާ ކުރެއްވީ ޕޯސްޓެއްގައި ވިދާޅުވީ މާލޭގެ މަގުތަކުގައި ދަތުރުފަތުރު ކުރާއިރު، ރައްކާތެރި ކަމަކީ ކޮންމެ ފަރުދަކު ވެސް އަބަދުމެ، ސަމާލުކަން ދޭންޖެހޭ ކަމެއް ކަމަށެވެ.

"ކޮންމެ ވަގުތަކީ ވެސް ނުރައްކާތެރި ހާދިސާއެއް ހިނގައި، ފުރާނައަށް ގެއްލުމެއް ލިބިދާނެ ވަގުތަކަށް ވެދާނެތީ، މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަކީ އަޅުގަނޑުމެން އެންމެންގެ ވެސް ޒިންމާއެކެވެ،" އަރީޝް ވިދާޅުވި އެވެ.

ފުލުހުން އާންމު ކޮށްފައިވާ ތަފާސްހިސާބުތައް ދައްކާ ގޮތުގައި މި އަހަރުގެ ޖެނުއަރީ މަހުން ފެށިގެން މާޗު މަހުގެ ނިޔަލަށް މާލެ ސަރަހައްދުގައި ޖުމުލަ 1068 އެކްސިޑެންޓު ހިނގާފައިވެ އެވެ. އޭގެ ތެރެއިން އެންމެ ގިނައީ މާލޭގައި ހިނގާފައިވާ އެކްސިޑެންޓުތަކެވެ.

އައްޑޫ ސިޓީ ކައުންސިލް