ގާނޫނަށް ގެނައި އިސްލާހާއެކު ކުޅިވަރު ކުރިއެރުވުން ލާމަރުކަޒީ ވާނެ: ރައީސް

ކުޅިވަރު ގާނޫނަށް ގެނައި އިސްލާހުގެ ސަބަބުން، ކުޅިވަރު ދާއިރާއަށް އަންނާނެ އެންމެ ހެޔޮ ބަދަލަކީ، ކުޅިވަރު ކުރިއެރުވުން ލާމަރުކަޒީވުން ކަމުގައި ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވީ، ރާއްޖޭގެ ކުޅިވަރު ގާނޫނަށް އެއް ވަނަ އިސްލާހު ގެނައުމުގެ ބިލު ތަސްދީގު ކުރެއްވުމަށް، ރައީސް އޮފީހުގައި މިއަދު ހެނދުނު ކުރިއަށްދިޔަ ހާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ.

މި ގެނެވުނު ފުރަތަމަ އިސްލާހާ އެކު ކުޅިވަރު ކުރިއެރުވުން ލާމަރުކަޒުވެ، ކުޅުންތެރީންނަށް ފުރުސަތު ފަހިވެ، ކޮންމެ ދާއިރާއަކުން ވެސް ޕްރޮފެޝަނަލް މިންގަނޑުތަކާ އެއްގޮތަށް ކުޅިވަރު ކުރިއަރުވައި ތަރައްގީ ކުރުމުގައި މިއަދު އަޅުގަނޑުމެން ކުރިއަށް މި އަޅަނީ ވަރަށް ތާރީހީ އަދި ވަރަށް މުހިންމު ފިޔަވަޅެއް ކަމުގައި ރައީސް ފާހަގަ ކުރެއްވި އެވެ.

ރައީސް ވިދާޅުވީ ގާނޫނަށް ގެނެވުނު އިސްލާހުތަކާއެކު ގާއިމު ކުރެވޭ ގައުމީ ކުޅިވަރު ފަންޑުގެ އެހީގައި، ކުޅިވަރުގެ ދާއިރާ ކުރިއެރުވުމަށް ކުރެވޭ ހަރަދު ދެމެހެއްޓެނިވި ގޮތެއްގައި އިތުރު ވެގެން ދާނެ ކަމަށެވެ. އަދި އަލަށް ގެނެވުނު ބަދަލުތަކާއި އެކު އުވޭ ކުޅިވަރު ކުންފުނީގެ މުވައްޒަފުންނަށް އެހެން ފުރުސަތުތައް ހޯއްދަވައިދެއްވާނެ ކަމުގައި ވެސް އެމަނިކުފާނު ވިދާޅުވި އެވެ.

ރާއްޖޭގެ ކުޅިވަރު ގާނޫނަށް ގެނައި އިސްލާހުގެ ސަބަބުން ދެފުށް ފެންނަ މިންވަރު އިތުރު ކުރެވި، ހިންގުން ހަރުދަނާ ކުރެވި، ގުޑްގަވާނަސްގެ އުސޫލުން ކަންކަން ކުރެވޭނެ ފިޔަވަޅު ތަކެއް ފަހިވެ، ކަށަވަރު ކުރެވިގެން ދާނެ ކަމުގެ ޔަގީންކަން ވެސް ރައީސް ވަނީ ދެއްވާފަ އެވެ.

ކުޅިވަރު ކުރިއެރުވުމަށާއި، ރާއްޖޭގެ އެކި ކަންކޮޅު ތަކުގައި އުފެދޭ މޮޅު ކުޅުންތެރީންނަށާއި އެތުލީޓުންނަށް، ގައުމީ ފެންވަރުގައި އަދި ބައިނަލްއަގުވާމީ ފެންވަރުގައި ކުރިއަށް ދިއުމާއި، ހުނަރު ތަރައްގީ ކުރުމުގެ ފުރުސަތު މި ބަދަލާއެކު އަދަށް ވުރެ ފަހިވެގެން ދާނެ ކަމުގައި ރައީސް ވިދާޅުވި އެވެ.

މިއަދު މި ތަސްދީގު ކުރެއްވި ބިލުގެ ސަބަބުން، ކުޅިވަރުގެ ދާއިރާއަށް އަންނާނެ އެންމެ ހެޔޮ ބަދަލަކީ، ކުޅިވަރު ކުރިއެރުވުން ލާމަރުކަޒީވުން ކަމުގައި ވެސް ރައީސް ވަނީ ފާހަގަ ކުރައްވާފަ އެވެ.

އަދި މިއަދުން ފެށިގެން ރާއްޖޭގެ ޕެރަލިމްޕިކް ކޮމިޓީއަކީ، މޯލްޑިވްސް އޮލިމްޕިކް ކޮމިޓީއާ އެއް ގިންތިއެއްގައި ހިންގާނެ ގާނޫނީ ބާރުވެރިކަން ފުރިހަމަ އަށް ލިބިފައިވާ ކުޅިވަރުގެ އިދާރާ އަކަށް ވެގެން ދިއުމާއެކު، ނުކުޅެދުންތެރިކަން ހުންނަ ފަރާތް ތަކަށް ވެސް ކުޅިވަރުގެ މައިދާނުން ހަމަހަމަ ފުރުސަތުތަކެއް ލިބޭނެކަން ރައީސްގެ ވާހަކަފުޅުގައި ވަނީ ފާހަގަ ކުރައްވާފަ އެވެ.

ހަމަ މިއާއެކު، ކުޅިވަރުގެ މައިދާނުގައި ޖިންސުގެ ތަފާތު ކުރުންތައް ގެންގުޅެގެން ނުވާނެކަން، ގާނޫނެއްގައި ލިޔެވިގެން ތަސްދީގު ކުރެވުނު މިއީ ފުރަތަމަ ފަހަރެވެ.