މި މަހު ގުޅިފަޅު ގޯތިތަކުގެ ރަޖިސްޓްރީ ދޫކުރަން ފަށާނަން: މިނިސްޓަރު

ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ހިންގި ބިންވެރިޔާ ސްކީމުގެ ދަށުން ގުޅިފަޅުން ދީފައިވާ ގޯތިތަކުގެ ރެޖިސްޓްރީ މި މަސްތެރޭ ހަވާލު ކުރަން ފަށާނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

ލޭންޑު ޔޫސް ޕްލޭނަށް އަނެއްކާ ވެސް ބަދަލު ގެނެސް ގުޅިފަޅުގެ ހިއްކާފައިވާ ސަރަހައްދުން ހުރިހާ ގޯއްޗެއް ދިނުމަށް ނިންމައި އެކަން ސަރުކާރުން މިއަދު ވަނީ ގެޒެޓު ކޮށްފަ އެވެ.

މިނިސްޓަރު މުއްތަލިބު މިރޭ ކުރެއްވި އެކްސް ޕޯސްޓެއްގައި ވިދާޅުވީ ގުޅީފަޅު ލޭންޑުޔޫސް ޕްލޭނަށް ބަދަލުގެނެސްފައި ވަނީ ގޯތި ހަވާލު ކުރުން އަވަސް ކުރުމަށް ކަމަށާއި އެ ގޮތުން އެ ލޭންޑްޔޫސް ޕްލޭނަށް ގެނައި ބަދަލު ގުޅިފަޅުގެ ގޯތި ލިބުނު ފަރާތްތައް ތަމްސީލު ކުރާ ޖަމުއިއްޔާއާ ހިއްސާކުރެވި ބިންތައް ދޭނެ ގޮތަކާ މެދު މަޝްވަރާ ވެސް ކުރެވިފައިވާ ކަމަށެވެ.

"މާތްﷲ ގެ އިރާދަފުޅާއެކު މި މަސްތެރޭ ގުރުއަތުލުން ބާއްވައި ބިން ތަކުގެ ރަޖިސްޓްރީ ހަދައިދޭން ފެށޭނެ، އަދި ސާވޭ ނިމުނުހާ އަވަހަކަށް ހަވާލު ކުރެވެން ހުރި ބިންތައް ބިމުގެ ވެރިފަރާތްތަކާ ހަވާލު ކުރެވޭނެ، މިއީ ގުޅީފަޅުން ގޯތި ލިބިފައިވާ ފަރާތް ތަކުގެ އެންމެ ބޮޑު ކަންބޮޑުވުން ކަމުގައިވާ ބިމުގެ ރަޖިސްޓްރީ ހަދައި ގޯތި ހަވާލު ކުރުން އަވަސް ކުރުމަށް ގެނެވުނު ބަދަލެއް،" މުއްތަލިބު ވިދާޅުވި އެވެ.

ގުޅިފަޅުގެ ލޭންޑް ޔޫޒް ޕްލޭން އެންމެ ފުރަތަމަ އިއުލާން ކުރީ 24 އޮގަސްޓް 2023 ގަ އެވެ. އޭރުގެ ޕްލޭނުގައި މީހުން ދިރިއުޅޭ ސަރަހައްދެއްގައި ހުންނާން ޖެހޭ މުހިއްމު ބައިތައް ނެތުމާއެކު އެ ޕްލޭން ބަދަލުކޮށް، 27 އޮކްޓޯބަރު 2024 ގައި އާ ޕްލޭނެއް ވަނީ އިއުލާނު ކޮށްފަ އެވެ.

އެ ޕްލޭނުގައި ސަރުކާރުން އިތުރަށް ހިއްކުމަށް ކަޑައަޅާފައިވާ ސަރަހައްދު ހިމެނޭހެން ގޯތި ދިނުމަށް ނިންމައި ގުރުއަތު ނެގުން ވެސް ވަނީ ބާއްވާފަ އެވެ.

ނަމަވެސް 24 އޮގަސްޓުގެ ޕްލޭނުގެ ދަށުން ގޯތި ލިބުނު ބައެއް ފަރާތް ތަކަށް އާ ޕްލޭނުގެ ދަށުން ގުރުއަތު ނެގުނު އިރު، އަދި ނުހިއްކާ ނަމަވެސް ހިއްކުމަށް ޕްލޭނު ކުރެވިފައިވާ ސަރަހައްދުން ގޯތި ލިބޭ ގޮތް ވެގެން ގޮސްފައިވެ އެވެ.

މިނިސްޓަރު ވިދާޅުވީ 24 އޮގަސްޓު 2023 ގެ ޕްލޭންގެ ދަށުން ގޯތި ލިބުނު ފަރާތް ތަކަށް ރެޖިސްޓްރީ ދޫކުރެވިފައި ވުމާއެކު، 27 އޮކްޓޯބަރު 2024 ގެ ޕްލޭނުގެ ދަށުން ގޯތި ރެޖިސްޓްރީ ހެދުމަށް ދަތިވެގެން ގޮސްފައި ވަނީ ކުރިން ރަޖިސްޓްރީ ދެވިފައިވާ ފަރާތް ތަކަށް އަދި ނުހިއްކާ ސަރަހައްދުން ގޯތި ލިބޭ ގޮތަށް ގުރުއަތު ނެގިފައި ވާތީ ކަމަށެވެ.