މުވާސަލާތީ ކުރިއެރުމުގެ ބޭނުން ހިފަންވީ ގައުމަށް އާމްދަނީ ހޯދަން: ރައީސް

ރައީސް ޑރ. މުޙައްމަދު މުއިއްޒު -- ފޮޓޯ/ ރައީސް އޮފީސް

މުވާސަލާތީ ކުރިއެރުމުގެ ބޭނުން ހިފަންވީ ގައުމަށް އާމްދަނީ ހޯދޭނެ މަގުތައް ފަހި ކުރުމަށް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

އެ މަނިކުފާނު މިހެން ވިދާޅުވީ، ދުނިޔޭގެ މުވާސަލާތާއި މައުލޫމާތުގެ ދާއިރާގެ ދުވަހުގެ މުނާސަބަތުގައި ކުރެއްވި އެކްސް ޕޯސްޓެއްގަ އެވެ.

ރައީސް ވިދާޅުވީ މުވާސަލާތީ ގޮތުން ދުނިޔެ ދެކެމުން އަންނަ ހަލުވި ކުރިއެރުމުގެ ބޭނުން ހިފަންވީ ރާއްޖެ އިޝްތިހާރުކޮށް، މަގުބޫލުކަން އިތުރު ކުރުމަށް ކަމަށެވެ.

"މުވާސަލާތީ ގޮތުން ދުނިޔެ މި ދެކޭ ހަލުވި ކުރިއެރުމުގެ ބޭނުން އަޅުގަނޑުމެން ހިފަންވީ ދިވެހިރާއްޖެ އިޝްތިހާރުކޮށް، މަގުބޫލުކަން އިތުރު ކުރުމަށް، ގައުމަށް އާމުދަނީ ހޯދޭނެ މަގުތައް ފަހި ކުރުމަށް،" ރައީސް ވިދާޅުވި އެވެ.

ރައީސްގެ ޕޯސްޓުގައި ވަނީ މުވާސަލާތާއި މައުލޫމާތު ފެތުރުމުގެ ދާއިރާގެ އެކި މަސައްކަތްތައް ކުރަމުން އަންނަ ހުރިހާ ހިދުމަތްތެރީންނަށް، ދުވަހުގެ ތަހުނިޔާ ދަންނަވާފަ އެވެ.

އޭގެ އިތުރުން ގައުމުގެ ތަރައްގީއާއި މުސްތަގުބަލަށް މުހިންމު މި ހިދުމަތުގައި އިތުރު ކުރިއެރުމާއި ކާމިޔާބީއަށް އެދިވަޑައިގަންނަވާ ކަމަށް ވެސް ރައީސް ވިދާޅުވި އެވެ.

ދުނިޔޭގެ މުވާސަލާތާއި މައުލޫމާތުގެ ދާއިރާގެ ދުވަހުގެ ގޮތުގައި ފާހަގަ ކުރަނީ ކޮންމެ އަހަރެއްގެ މޭ މަހުގެ 17 ވަނަ ދުވަހެވެ.

ރައީސް ޑރ މުޢިއްޒު