ދާންމަތިވެފައި ތިބޭ އިސްރަށްވެހީންގެ ގާތަށް ޒިޔާރަތްކުރުމުގެ ޕްރޮގްރާމެއް ފަށައިފި

ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ކުރިއަށްގެންދާ "ބެޑްރިޑަން ޕްރޮގްރާމް" ގެ ދަށުން އިސްރަށްވެހިންނާއި ގާލް ގައިޑް ކުދިންނާއެކު އިސްރަށްވެހިންގެ ތެރެއިން ދާންމަތިވެފައި ތިބޭ މީހުންގެ ގާތަށް ޒިޔާރަތް ކުރަން ފަށައިފި އެވެ.

މި ޕްރޮގްރާމަކީ އުމުރުން ދުވަސްވީ މީހުންގެ ތެރެއިން ދާންމަތިވެފައިވާ ފަރާތްތަކަށް ބޭނުންވާ ސިއްހީ ހިދުމަތްތައް ފަސޭހަކަމާއެކު ފޯރުކޮށްދެވޭނެ އިންތިޒާމު ހަމަޖައްސައި،އެ ފަރާތްތަކާއި އެ ފަރާތް ތަކުގެ އާއިލާ ތަކަށް ބޭނުންވާ އެހީތެރިކަމާއި އިޖުތިމާއީ ހިދުމަތްތައް ފޯރުކޮށްދިނުމުގެ މަގުސަދުގައި ކުރިއަށް ގެންދާ ހާއްސަ ޕްރޮގްރާމެއް ކަމަށް ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ބުންޏެވެ.

މިނިސްޓްރީން ބުނިގޮތުގައި އާ ބަދަލުތަކާއެކު އިއްޔެ ފަށައިގަތް "ބެޑްރިޑަން ޕްރޮގްރާމް" ކުރިއަށް ގެންދިއުމަށް ރޭވިފައިވަނީ އިސްރަށްވެހިންގެ ނާދީގައި ރަޖިސްޓްރީ ކުރެވިފައިވާ މެންބަރުންގެ ތެރެއިން ވޮލަންޓިއާކޮށް ގެތަކަށް ޒިޔާރަތް ކުރަން ބޭނުންވާ މީހުންނަށް ފުރުސަތު ހުޅުވާލައިގެންނެވެ.

އެގޮތުން، އެ މީހުންނަށް ހާއްސަ ތަމްރީނު ޕްރޮގްރާމެއް ކުރިއަށް ގެންގޮސް، ގެ ތަކަށް ޒިޔާރަތް ކުރާއިރު މުއާމަލާތު ކުރަންވީ ގޮތުގެ ފުރިހަމަ ތަމްރީނު ވަނީ ދެވިފައެވެ. އަދި އެމީހުންނާއެކު ގާލް ގައިޑްގެ ކުދިން ވެސް ބައިވެރިވާނެ އެވެ.

ދެމެހެއްޓެނިވި ގޮތެއްގައި ކުރިއަށް ގެންދާ މި ޕްރޮގްރާމުގެ ތެރެއިން މަހަކު އެއްފަހަރު ވޮލެންޓިއާ ޓީމުތަކުން ގެތަކަށް ޒިޔާރަތްކޮށް، ދާންމަތިވެފައި ތިބޭ އިސްރަށްވެހިންނާއި އާއިލާތަކުގެ ހާލު ބަލާގޮތަށް ވަނީ ހަމަޖެހިފަ އެވެ.