އަޒްމިރަލްދާ އާއި މަހާޒް، ފަނޑިޔާރު ކަމުން ވަކިކުރަން މަޖިލީހުން ފާސްކޮށްފި

ސުޕްރީމް ކޯޓުގެ ފަނޑިޔާރުކަމުން މަހާޒު އަލީ ޒާހިރު އާއި ޑރ. އަޒްމިރަލްދާ ޒާހިރު ވަކިކުރަން ރައްޔިތުންގެ މަޖިލީހުން ފާސްކޮށްފި އެވެ.

މިއަދުގެ ރައްޔިތުންގެ މަޖިލީހުގެ ތަޅުމުގައި ނެގި ވޯޓުގައި މި ދެ ފަނޑިޔާރުން ވަކި ކުރަން 68 މެންބަރުން ވޯޓު ދެއްވި އެވެ. ދެކޮޅަށް ވޯޓު ދެއްވީ 11 މެންބަރުންނެވެ. އެ މެންބަރުންގެ ތެރޭގައި ޕީއެންސީއަށް ނިސްބަތްވެވަޑައިގަންނަވާ ހިތަދޫ މެދު ދާއިރާގެ މެންބަރު އަހުމަދު އަޒާން ވެސް ހިމެނެ އެވެ.

ދެ ފަނޑިޔާރުން ވަކި ކުރަން ޖޭއެސްސީން ނިންމި މައްސަލައިގެ ރިޕޯޓު، މަޖިލީހުގެ ޖުޑީޝަރީ ކޮމިޓީ އިން ދިރާސާ ކުރުމަށްފަހު، ފާސް ކުރީ އެ ރިޕޯޓު ރަގަޅު ކަމަށެވެ. އެ ކޮމިޓީން ބޭއްވި ސިއްރު ބައްދަލު ވުމުގައި ފަނޑިޔާރުން ވަކި ކުރުމަށް ނިންމައިފައިވާއިރު، ސުލޫކީ މައްސަލައެއް ބަލާފައި ވަނީ އިޖުރާއަތު ފުރިހަމަ ނުކޮށް، ގާނޫނާ ހިލާފަށް ކަމަށް ވިދާޅުވެ، އެ މައްސަލަ ބަލަން ޖޭއެސްސީން ނިންމީ ގޯސްކޮށް ކަމަށް މަޖިލީހުގެ ކައުންސެލް ޖެނެރަލް ފާތިމަތު ފިލްޒާ އެ ކޮމިޓީއަށް ވަނީ ލަފާ ދެއްވާފަ އެވެ.

ނަމަވެސް ޖުޑީޝަރީ ކޮމިޓީން ނިންމާފައި ވަނީ ޖޭއެސްސީ އިން ދެ ފަނޑިޔާރުންގެ މައްސަލަ ބަލާފައި ވަނީ އިޖުރާއަތުތައް ފުރިހަމަ ކުރުމަށް ފަހުގައި ކަމަށެވެ.

ފަނޑިޔާރުކަމުން އަޒްމިރާލްދާ އާއި މަހާޒު ވަކިކުރަން ޖޭއެސްސީން ނިންމީ، އަޒްމިރާލްދާގެ ފިރިކަލުން ޑރ. އިސްމާއީލް ލަތީފް މަސާޖު ޕާލާއަކުން މިދިޔަ ޑިސެމްބަރު މަހުގެ ތެރޭގައި ހައްޔަރު ކުރުމުން އޭނާ ބަންދުން ދޫކޮށްލުމަށް، ކްރިމިނަލް ކޯޓުގެ ގާޒީ ސޮފްވަތު ހަބީބު މެދުވެރިކޮށް، މައްސަލަ ބެއްލެވި ގާޒީއަށް ގުޅައިގެން ނުފޫޒު ފޯރުވި ކަމުގެ ތުހުމަތުގަ އެވެ. އެ މައްސަލަ ބެއްލެވީ ގާޒީ ޒިހުނީ އެވެ.