ދިޔަވަރު ބޮޑުވާ ވަގުތުތަކުގައި ބައެއް ރަށްރަށަށް އުދަ އަރާފާނެ

ގދ. ތިނަދޫއަށް އުދަ އަރާފައި --

ދިޔަވަރު ބޮޑުވާ ވަގުތުތަކުގައި ބައެއް ރަށްރަށަށް އުދައެރުން އެކަށީގެންވާ ކަމަށް މޫސުމާ ބެހޭ ގައުމީ އިދާރާ، މެޓު އޮފީހުން ބުނެފި އެވެ.

މިއަދުގެ މޫސުން ލަފާކޮށް މެޓުން ބުނީ ރާއްޖޭގެ އެކި ހިސާބަށް ވިއްސާރަކުރުމާއެކު ގުގުރާނެ ކަމަށާއި އަދި ބައެއް ރަށްރަށަށް ބޯކޮށް ވާރޭ ވެހުން އެކަށީގެންވާ ކަމަށެވެ. އެގޮތުން މިއަދު ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރުކުރުމަކީ އެކަށީގެންވާކަމެއް ކަމަށް މެޓުން ބުންޏެވެ. ދިޔަ ބޮޑުވާނެ ކަމަށް ބެލެވެނީ މިއަދު މެންދުރުން އަނބުރާ 2:15 ހާއިރުއެވެ.

މެޓުން ބުނީ މިއަދު ރާއްޖޭގެ ކަނޑުތައް ގަދަވާނެ ކަމަށެވެ. އަދި ކަނޑުތަކުގެ ރާޅުގެ އުސްމިން ހުންނާނީ 4 ފޫޓާ 7 ފޫޓާއި ދެމެދުގައި ކަމަށެވެ.

އޭގެ އިތުރުން ހުޅަނގުދެކުނާއި ހުޅަނގުން ގަޑިއަކު 13 މޭލާއި 23 މޭލާއި ދެމެދުގެ ބާރުމިނުގައި އަދި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވާކަމަށް ވެސް މެޓުން ލަފާކޮށްފައިވެ އެވެ.

މެޓް އޮފީސް