ވެމްކޯ މުވައްޒަފުންގެ ޕެންޝަން ފައިސާ ޖަމާ ނުކުރާ ވާހަކަ ދޮގުކޮށްފި

ވެމްކޯ މުވައްޒަފުންގެ ޕެންޝަން ފައިސާ ޖަމާ ނުކުރާތާ 8 މަސް ދުވަސް ވެފައިވާ ކަމަށް ބުނެ، ސޯޝަލް މީޑިއާގައި ފަތުރަމުންދާ ވާހަކަތައް، އެ ކުންފުނިން ދޮގުކޮށްފި އެވެ.

ވެމްކޯއިން ނެރުނު ނޫސްބަޔާނެއްގައި ބުނީ މިއަދާ ހަމައަށް ވެސް އެ ކުންފުނިން އަންނަނީ މުވައްޒަފުންގެ ޕެންޝަން ފައިސާ ދައްކަމުން ކަމަށެވެ. އަދި ޕެންޝަން އޮފީހާއި އެ ކުންފުންޏާ ދެމެދު ވާހަކަތައް ދެކެވި، ޖެހިފައިވާ މައްސަލަ ހައްލު ކުރުމުގެ މަސައްކަތް މިހާރު ކުރަމުން އަންނަ ކަމަށް ބުންޏެވެ.

ވެމްކޯގެ މާލީ ހާލަތަށް ބަލާއިރު، އެ ކުންފުނީގެ ހަރަދު ތަކާއި މުވައްޒަފުންގެ މުސާރަ ހަމަޖައްސަމުން އަންނަނީ ކޯޕަރޭޝަނަށް ލިބޭ އާމްދަނީ އަކުން ކަމުގައިވެފައި، ކޯޕަރޭޝަންގެ އާމްދަނީގެ ގޮތުގައި ލިބެންޖެހޭ ފައިސާ ގިނަ ތަންތަނުން ނުލިބޭ ކަމާއި އެ ގޮތުން މާލޭ ސިޓީ ކައުންސިލުން މިހާރު ވެސް ދައްކަން ޖެހި، ނުދައްކާ 66 މިލިއަނެއްހާ ރުފިޔާ ވާ ކަމަށް ވެމްކޯގެ ބަޔާނުގައިވެ އެވެ.

އަދި މި ވަގުތު މުވައްޒަފުންގެ މުސާރަ އާއި ޕެންޝަން ފައިސާގެ ކަންކަމާ ގުޅިގެން ޕެންޝަން އޮފީހާ ވާހަކަ ދައްކައިގެން ފަސޭހަ އިންތިޒާމަކުން ފައިސާ ހަލާސް ކުރެވޭނެ ގޮތަކަށް ދެ ފަރާތުން އެއްބަސްވެވިފައިވާ ކަމަށް ވެމްކޯ އިން ބުންޏެވެ.

އެގޮތުން އެއްވެސް މުވައްޒަފެއްގެ ޕެންޝަން ހައްގަށް އުނިކަމެއް ނާންނާނޭހެން، ފައިސާ ދެއްކުން ރޭވިފައިވާ ކަމުގެ ޔަގީންކަން ކުންފުނިން ދީފައިވެ އެވެ.

ވެމްކޯއިން އިލްތިމާސްކޮށްފައި ވަނީ މުވައްޒަފުންނަށް އޮޅޭނެހެން، އަދި ސަރުކާރާއި ކޯޕަރޭޝަންގެ މުވައްޒަފުންގެ ހިތުގައި ނަފުރަތާއި ރުޅިވެރިކަން އުފެދޭނެ ގޮތަށް މައުލޫމާތު ފަތުރަމުންދާތީ، އެކަން އެ ގޮތަށް ނުކުރުމަށެވެ.