ރައީސްގެ ދެ ކަނބަލުން، ކުޑަކުދިންގެ ދުވަހުގެ ހަރަކާތްތައް ބައްލަވައިލައްވައިފި

އެޑިއުކޭޝަން މިނިސްޓްރީން އިސް ނަގައިގެން ފުރަތަމަ ފަހަރަށް ގައުމީ ފެންވަރުގައި ކުޑަކުދިންގެ ދުވަސް ފާހަގަ ކުރުމަށް ކުރިއަށް ގެންދިޔަ ހަރަކާތް ތަކުގެ ތެރެއިން، ހުޅުމާލޭ ސެންޓްރަލް ޕާކުގައި ކުރިއަށް ދިޔަ ކުޑަކުދިންގެ ހަވީރަށް، ރައީސް ޑރ. މުޙައްމަދު މުއިއްޒު އާއި އެ މަނިކުފާނުގެ އަނބިކަނބަލުން، މެޑަމް ސާޖިދާ މުޙައްމަދު ޒިޔާރަތް ކުރައްވައިފި އެވެ.

މިއަދު ހަވީރު ކުރިއަށް ދިޔަ މި ހަރަކާތް އޮތް ސަރަހައްދަށް ރައީސްގެ ދެ ކަނބަލުން ވަޑައިގެންނެވުމުން މަރުހަބާ ވިދާޅުވީ، އެޑިއުކޭޝަން މިނިސްޓްރީގެ އިސްވެރިންނާއި ސުކޫލު ތަކުގެ އިސްވެރިންނެވެ.

މިއަދު ކުރިއަށްދިޔަ ހަވީރުގައި، ދަރިވަރުންގެ ފަރާތުން ރައީސަށް ވަނީ ހާއްސަ ހަދިޔާއެއް އަރުވައިފަ އެވެ.

ކުޑަކުދިންގެ ހަވީރަށް ޒިޔާރަތް ކުރައްވައި، ރައީސްގެ ދެކަނބަލުން ވަނީ އެ ތަނުގައި ހުރި ސްޓޯލްތައް ބައްލަވައިލައްވައިފަ އެވެ. އަދި މި ހަވީރުގައި ދަރިވަރުންގެ ފަރާތުން ހުށަހަޅައިދިން ސްޓޭޖް ހަރަކާތްތައް ވެސް ދެ ކަނބަލުން ބައްލަވައިލެއްވި އެވެ.

މީގެ އިތުރުން، ރައީސްގެ ދެކަނބަލުން ވަނީ ހަވީރުގައި ބައިވެރިވި ބައެއް ކުދިންނާއި، އެ ކުދިންގެ އާއިލާތަކާ، ބައްދަލު ކުރައްވައިފަ އެވެ.

ރައީސް އޮފީހުން ބުނީ ހުރިހާ ސުކޫލަކަށް އެހީތެރިކަން ފޯރު ކޮށްދީގެން މި އަހަރުގެ ކުޑަކުދީންގެ ދުވަސް މި ފަދަ ގޮތަކަށް ފާހަގަ ކުރުމުގެ މައިގަނޑު މަގުސަދަކީ، ދުވަހުގެ ހަރަކާތް ތަކުގައި ކުދީންނާއި އެކު، އެ ކުދީންގެ އާއިލާ ތަކަށް ވެސް ބައިވެރި ވެވޭ ގޮތަށް ދުވަހުގެ ހަރަކާތްތައް ކުރިއަށް ގެންދިއުން ކަމަށެވެ.

މި ހަވީރު އިންތިޒާމު ކޮށްފައި ވަނީ، ކުޑަކުދިންނާ ގުޅޭ ޝައުގުވެރި، ތައުލީމީ ހަރަކާތް ތަކާއި، މަޖާ ކުޅިވަރު ތަކުގެ އިތުރުން މުނިފޫހިފިލުވުމުގެ ހަރަކާތްތަކާ ވެސް އެކުގަ އެވެ.

ކޮންމެ އަހަރެއްގެވެސް، މެއި މަހުގެ 10 ވަނަ ދުވަސް، ރާއްޖޭގައި ފާހަގަ ކުރަނީ ކުޑަކުދިންގެ ދުވަހުގެ ގޮތުގަ އެވެ.