މިހާތަނަށް އެންމެ ގިނަ މީހުން ލޯނު ނަގާފައިވަނީ ޒަމާނީ ދަނޑުވެރިކަމަށް

ދަނޑުވެރިކަމާއި ދިރޭތަކެއްޗާ ބެހޭ ވުޒާރާ އާއި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން(އެސްޑީއެފްސީ) އާ ގުޅިގެން ދޫކުރާ ދަނޑުވެރިނަފާ ލޯނުގެ ތެރެއިން މިހާތަނަށް އެންމެ ގިނަ މީހުން ލޯނު ނަގާފައި ވަނީ ޒަމާނީ ދަނޑުވެރިކަން ކުރުމަށް ކަމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަނުން ބުނެފި އެވެ.

އެސްޑީއެފްސީގެ ޕީޕީއަރު ޔުނިޓްގެ ޑެޕިއުޓީ މެނޭޖަރު އައިމިނަތު މުހާ ވިދާޅުވީ ދަނޑުވެރިނަފާ ލޯނަށް 2019 އިން ފަށައިގެން ހުޅުވާލާފައިވާއިރު، މިހާތަނަށް ލޯނު ނަގާފައިވާ ގިނަ ފަރާތް ތަކުން ލޯނު ނަގާފައި ވަނީ ޒަމާނީ ދަނޑުވެރިކަން ކުރުމަށް ކަމަށެވެ.

"މިހާތަނަށް އެއްލައްކަ ރުފިޔާ އާއި ހަމައަށް ނެގޭ ލޯނު ޖުމުލަ 18 ފާރާތަކުން ވަނީ ނަގާފަ، އެ ގޮތުން 1.4 މިލިއަން ވަނީ ދޫކޮށްފަ، އަދި 2 މިލިޔަނާއި ހަމައަށް 23 ފަރާތަކުން ނަގާފައިވާއިރު, އެ ފަރާތަކަށް 14.5 މިލިއަން ވަނީ ދޫކޮށްފަ،" ނުހާ ވިދާޅުވި އެވެ.

އެންމެ ގިނަ މީހުން 2 މިލިއަނާ ހަމައަށް ލޯނު ނަގާފައިވާއިރު، ޒަމާނީ ދަނޑުވެރި ކަމުގެ އިތުރުން ވާޓިކަލް ފާމިން، އަދި ގުރީން ހައުސް ފާމިން އަށް ގިނަ ފަރާތް ތަކުން ލޯނު ނަގާފައިވާކަން އެ ކޯޕަރޭޝަނުން ފާހަގަ ކުރި އެވެ.

އެސްޑީއެފްސީ އިން ބުނީ ޒަމާނީ ދަނޑުވެރި ކަމަށް ދަނޑުވެރިންގެ ފޯކަސް ހުރި ނަމަވެސް ޕޮއެލްޓްރީ ފާމިން ނުވަތަ ކުކުޅު ފާމިން ފަދަ ކަންކަމަށް ސަމާލުކަން ދޭ މިންވަރު ކުޑަ ކަމަށެވެ.

ދަނޑުވެރިނަފާ ލޯނުގައި 2 ކެޓެގްރީއެއް ހިމަނާފައިވެ އެވެ. އެއީ އެއްލައްކަ ރުފިޔާ އާއި ހަމައަށް ނެގޭ ލޯނަކާއި އެއްލައްކައިން ފަށައިގެން 2 މިލިޔަނާއި ހަމައަށް ދޫކުރާ ލޯނެވެ.

މީގެން ކޮންމެ ލޯނަކަށް ވެސް އަހަރަކު ނަގާނީ 6 އިންސައްތައިގެ އިންޓަރެސްޓެވެ.

އެހެން ނަމަވެސް އެއްލައްކަ ރުފިޔާ އާއި ހަމައަށް ނެގޭ ލޯނު ދެއްކުމަށް އެންމެ ދިގު މުއްދަތަކަށް ކަނޑައަޅާފައި ވަނީ 3 އަހަރެވެ. އަދި 2 މިލިޔަނާއި ހަމައަށް ދޫކުރާ ލޯނު ދެއްކުމަށް ދެނީ ގިނަވެގެން 7 އަހަރެވެ.