މެޑަމް ސާޖިދާގެ އަރިހަށް، މެކް ފައުންޑޭޝަންގެ މަންދޫބުން ޒިޔާރަތް ކުރައްވައިފި

ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދުގެ އަރިހަށް، މެކް ފައުންޑޭޝަންގެ މަންދޫބުން ޒިޔާރަތް ކުރައްވައިފި އެވެ.

މި ބައްދަލުވުން ކުރިއަށް ގެންދަވާފައިވަނީ މުލީއާގޭގަ އެވެ.

މެޑަމްގެ އަރިހަށް ޒިޔާރަތް ކުރެއްވީ މެކް ފައުންޑޭޝަންގެ ބޯޑް އޮފް ޓްރަސްޓީސްގެ ޗެއާމަން އަދި އީ މެކް ކޭޖީ ގެ އެގްޒެކެޓިވް ބޯޑުގެ ޗެއާމަން ޕްރޮފެސަރު ޑރ. ފްރޭންކް ސްޓަންގެންބާގް ހަވަކެމްޕް އާއި މެކް ފައުންޑޭޝަންގެ ޗީފް އެގްޒެކެޓިވް އޮފިސަރު ސެނެޓާ ޑރ. ރަޝާ ކެލެޖް، އެވެ.

މި ބައްދަލުވުމުގައި ޕްރޮފެސަރު ޑރ. ސްޓަންގެންބާގް ހަވާކެމްޕް އާއި ސެނެޓަރު ޑރ. ކެލެޖް ވަނީ، މެކް ފައުންޑޭޝަން މެދުވެރިވެގެން ރާއްޖޭގެ ސިއްހީ ދާއިރާ އިތުރަށް ކުރިއެރުވުމަށް، މެޑަމް ސާޖިދާއާ އެކު ކުރެވިދާނޭ މަސައްކަތްތަކާ ގުޅޭގޮތުން މަޝްވަރާ ކުރައްވާފަ އެވެ.

އެގޮތުން ވަކި ދާއިރާ ތަކުން ހާއްސަވުމަށް ޑޮކްޓަރުން ހޯދަންޖެހޭ ތަމްރީނުގެ ފުރުސަތުތައް ފަހިކޮށް ދިނުމާއި، ސްކޮލަޝިޕްގެ ފުރުސަތުތަކާ ބެހޭގޮތުން މި ބައްދަލުވުމުގައި މަޝްވަރާ ކުރައްވާފައިވެ އެވެ.

މި މަޝްވަރާގައި މެޑަމް ސާޖިދާ ވަނީ، ރާއްޖޭގެ ސިއްހީ ދާއިރާއާ ގުޅުންހުރި މައުލޫމާތުތައް ހިއްސާ ކުރައްވައި ސިއްހީ ނިޒާމު ހަރުދަނާ ކުރުމަށް ސަރުކާރުން ކުރަމުން އަންނަ މަސައްކަތްތައް ފާހަގަ ކުރައްވާފަ އެވެ.

މިއަދުގެ ބައްދަލުވުން ނިންމަވާލައްވަމުން މެކް ފައުންޑޭޝަނުގެ މަންދޫބުން ވަނީ، ރާއްޖޭގެ ސިއްހީ ދާއިރާގެ ގާބިލުކަން އިތުރުކޮށް، ދަރިމައިވުމާ ގުޅުންހުރި ކުށްހީތައް ނައްތާލައި އަންހެނުން ބާރުވެރި ކުރުމަށް މެޑަމް ސާޖިދާ ކުރައްވާ މަސައްކަތް ތަކުގެ އަގު ވަޒަން ކުރައްވާފަ އެވެ. އަދި އެ ކަމަނާ އަކީ މެކް ފައުންޑޭޝަންގެ "މޯ ދެން އަ މަދާ" ޕްރޮގްރާމުގެ އެންބެސެޑަރެއްކަން ވެސް ފާހަގަ ކުރައްވާފައިވެ އެވެ.

މި ޕްރޮގްރާމަކީ، ދަރިމައިވުމުގެ ސިއްހަތާ ގުޅުންހުރި ސިޔާސަތުތައް އެކުލަވާލުމުގައްޔާއި، އެ ކަމާ ގުޅުންހުރި ފަރުވާގެ ގާބިލުކަން އިތުރު ކުރުމުގައްޔާއި، ދަރިމައިވުމާ ގުޅުންހުރި ކުށްހީތައް ނައްތާލުމުގައްޔާއި، ދަރިމައިވުމުގެ މައްސަލަ ތަކުން ރައްކާތެރިވުމާއި ދަރިންލިބުމުގައި ފިރިހެނުންނަށް ދިމާވާ މައްސަލަތަކާ ގުޅޭ ގޮތުން ހޭލުންތެރިކަން އިތުރު ކުރުމަށް ޓަކައި، އެފްރިކާ އަދި އޭޝިޔާގެ ފަސްޓް ލޭޑީންނާއި އަންހެން އިސްވާރުންނާއެކު ހަރަކާތް ތަކެއް ކުރިއަށް ގެންދާ ޕްރޮގްރާމެކެވެ.