ފަތުރުވެރިކަން ކުރިއަރުވަން އެމްއެމްޕީއާރުސީއާއި ގަތަރު އެއާވޭސްއާ ދެމެދު އެއްބަސްވެއްޖެ

ރާއްޖޭގެ ފަތުރުވެރިކަން ކުރިއަރުވަން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި ގަތަރު އެއާވޭސް އާ އެކު އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގައި ސޮއި ކުރުމަށް މިއަދު ބޭއްވި ހާއްސަ ރަސްމިއްޔާތުގައި ޓޫރިޒަމް މިނިސްޓަރު ތޯރިގު އިބްރާހީމް ބައިވެރިވެވަޑައިގެންނެވި އެވެ.

ޓޫރިޒަމް މިނިސްޓްރީން ބުނީ މި އެއްބަސްވުމުގެ ދަށުން، ދެ ފަރާތުން ގުޅިގެން ރާއްޖޭގެ ފަތުރުވެރިކަން އިތުރަށް ކުރިއެރުވުމަށް މަސައްކަތް ކުރާނެ ކަމަށެވެ. އަދި ގަތަރު އެއާވޭސްގެ ވިއުގައިގެ ތެރެއިން ރާއްޖެއަށް އަންނަ ފަތުރުވެރިންގެ އަދަދު އިތުރު ކުރުމަށް އަމާޒުކޮށް، އެކި ގައުމު ތަކުގައި ޕްރޮމޯޝަނަލް ހަރަކާތްތައް ހިންގުމަށް ރާވައިވާ ކަމަށް މިނިސްޓްރީން މައުލޫމާތު ދިނެވެ.

މިއަދުގެ ރަސްމިއްޔާތުގައި މިނިސްޓަރު ތޯރިގު ވިދާޅުވީ މި އެއްބަސްވުމަކީ ރާއްޖޭގެ ފަތުރުވެރިކަމުގެ ސިނާއަތަށް ވަރަށް މުހިންމު ކުރިއެރުމެއް ގެނެސްދޭނެ ކަމެއް ކަމަށެވެ. އަދި ގަތަރު އެއާވޭސް، ފަދަ ބައިނަލްއަގުވާމީ އެއާލައިނަކާއެކު މި ފަދަ ގުޅުމެއް ގާއިމު ކުރެވުން މާކެޓިން މަސައްކަތް ތަކަށް ވަރަށް ބޮޑު ފުރުސަތެއް ލިބިގެންދާނެ ކަމަށް ވެސް އެ މަނިކުފާނު ވިދާޅުވި އެވެ.

މިނިސްޓްރީން ބުނީ މި އެއްބަސްވުމުގެ ސަބަބުން ރާއްޖެއަށް އަންނަ ފަތުރުވެރިންގެ އަދަދު އިތުރުވެ، ރާއްޖޭގެ އިގުތިސާދަށް ފައިދާ ކުރާނެ ކަމަށް އުއްމީދު ކުރާ ކަމަށެވެ. އަދި މިކަމުގެ ސަބަބުން ރާއްޖެއަކީ ދުނިޔޭގެ އެންމެ މަގުބޫލު ޓޫރިސްޓް މަންޒިލުގެ ގޮތުގައި ދެމެހެއްޓުމަށް އިތުރު ބާރަކަށް ވެގެންދާނެ ކަމަށް ބެލެވޭ ކަމަށް ވެސް ބުނެފައިވެ އެވެ.