"އަންހެނުންގެ ކޮމިޓީތަކަށް ދިމާވާ ދަތިތަކަށް ދެ އަހަރު ތެރޭ ހައްލު ލިބޭނެ"

އަންހެނުންގެ ކޮމިޓީ ތަކަށް ދިމާވާ ދަތިތަކަށް ކުރިއަށް ދެ އަހަރެއްގެ ތެރޭގައި އެކަށީގެންވާ ހައްލު މި ސަރުކާރުން ގެނެސްދޭނެ ކަމަށް ލޯކަލް ގަވަނަންސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

އަންހެންވެރީންގެ ސައްލާ، މަސައްކަތު ބައްދަލުވުން ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން، އެ މަނިކުފާނު ވިދާޅުވީ ލާމަރުކަޒީ ގާނޫނުގައި އަންހެނުންގެ ކޮމިޓީ ތަކުގެ ދައުރު އަދާކުރުމުގައި ހުރި ގޮންޖެހުން ތަކާއި، މުވައްޒަފުންގެ ދަތި ކަމާއި، ޖާގައިގެ ދަތިކަމަށް ކުރިއަށް އޮތް ދެ އަހަރެއްގެ ތެރޭ އެކަށީގެންވާ ހައްލު ލިބިގެން ދާނެ ކަމަށެވެ.

އާދަމް ޝަރީފުގެ ވާހަކަފުޅުގައި، މިހާރު ފެށިފައިވާ ކައުންސިލް އިމާރާތްތައް އަޅައި ނިމޭ އިރު ޖާގައިގެ ދަތިކަން 70 އިންސައްތަ ކޮމިޓީއަށް ހައްލު ވެގެންދާނެ ކަމަށް ވިދާޅުވި އެވެ. އަދި ކޮމިޓީތައް ބާރުވެރިވެ، އަމިއްލަ އުފެއްދުންތެރި ކަމުގެ ކޮމިޓީ ތަކަކަށް ވުމުގެ ވިސްނުމާއި، އާމްދަނީ ހޯދޭނެ މަގުތައް ކޮށައި، އަމިއްލަ ފުދުންތެރި ކަމުގައި ހިންގޭ ކޮމިޓީ ތަކަކަށް ވުމަށް މަސައްކަތް ކުރުމަށް އެ މަނިކުފާނު އިލްތިމާސް ކުރެއްވި އެވެ.

މިއަދު ފެށުނު އަންހެންވެރީންގެ ސައްލާ މާދަމާގެ ނިއަލަށް ކުރިއަށް ދާނެ އެވެ.

މިއީ އަންހެނުންގެ ތަރައްގީއަށް މަސައްކަތް ކުރާ ކޮމިޓީ ތަކަށް ހާއްސަ ކޮށްގެން ލޯކަލް ގަވަރުމެންޓް މިނިސްޓްރީން ކުރިއަށް ގެންދާ މި ފަދަ ފުރަތަމަ މަސައްކަތު ބައްދަލު ވުމެވެ.

ލޯކަލް ގަވަނަންސް މިނިސްޓްރީ