ސަރުކާރުން އެޅި ފިޔަވަޅުތަކާއެކު ރައްޔިތުންގެ ޒާތީ މައުލޫމާތު ލީކުވުން ވާނީ ހުއްޓުވާފައި: އިހުސާން

މި ސަރުކާރުން އެޅި ފިޔަވަޅުތަކާއެކު ރައްޔިތުންގެ ޒާތީ މައުލޫމާތު ލީކުވުން ހުއްޓުވާފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މީކާއިލް އަހުމަދު ނަސީމް ކުރެއްވި ސުވާލަށް ޖަވާބު ދެއްވަމުންނެވެ.

ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން، ޑީއެންއާރުގެ ޑޭޓާބޭސް ބޭނުންކޮށްގެން ޕީއެންސީއަށް މެންބަރުން ވައްދާފައިވާ ކަމަށް ތުހުމަތު ކުރައްވައި މެންބަރު ވަނީ އޭގެ ރައްކާތެރިކަން ކަށަވަރު ކުރުމަށް އަޅުއްވާ ފިޔަވަޅު ތަކަކީ ކޮބައިތޯ ސުވާލު ކުރައްވާފަ އެވެ.

ޖަވާބުގައި އިހުސާން ވިދާޅުވީ ދައުލަތުގައި ހުރި ރައްޔިތުންގެ ޒާތީ މައުލޫމާތު މީގެ ކުރިން ލީކުވެފައިވާ ކަމަށާއި، ނަމަވެސް ސަރުކާރުން އެޅި ފިޔަވަޅު ތަކާއެކު ރައްޔިތުންގެ ޒާތީ މައުލޫމާތު ލީކުވުން ހުއްޓުވާފައިވާ ކަމަށެވެ.

އިހުސާން ވަނީ ޑީއެންއާރުގެ ޑޭޓާބޭސްގެ ތެރެއިން ރައްޔިތުންގެ ޒާތީ މައުލޫމާތު ހޯދައިގެން އެއްވެސް ޕާޓީ އަކަށް އެއްވެސް މީހަކު ވައްދާފައި ނުވާނެ ކަމަށް ތަކުރާރުކޮށް ވިދާޅުވެފަ އެވެ.

މިނިސްޓަރު ވިދާޅުވީ ރައީސުލްޖުމްހޫރިއްޔާގެ ޑިޖިޓަލައިޒޭޝަންގެ ސިޔާސަތުގެ ދަށުން "މޯލްޑިވްސް 2.0"ގެ ނަމުގައި ރާއްޖޭގެ އީފާސްގެ ހިދުމަތް ހަރުދަނާކޮށް، ޑިޖިޓަލް އައިޑެންޓިޓީ އިތުރަށް ވަރުގަދަ ކުރުމުގެ މަސައްކަތްތައް ފައްޓަވާފައިވާ ކަމަށެވެ. އަދި އީފާސްއަކީ ކުރިއަށް އޮތް ތަނުގައި ރާއްޖޭގައި މުއާމަލާތް ކުރުމަށް ބޭނުންވާ މައުލޫމާތު ހިމެނޭ އައިޑެންޓިޓީ އަކަށް ވެގެންދާނެ ކަމަށް ވެސް ވިދާޅުވި އެވެ

މި ދައުރުގެ ތެރޭގައި ޑީއެންއާރުގެ ޑޭޓާބޭސް ކޮމްޕްރޮމައިޒްވެފައި ނޯންނާނެ ކަމަށް ވެސް އިހުސާންގެ ވާހަކައިގައި ފާހަގަ ކުރެއްވި އެވެ.

ސައްހަ ނޫން ފޯމު ތަކުގައި ހެކިންގެ ގޮތުގައި ސޮއިކޮށްފައިވާ ފަރާތްތަކާ މެދު އެޅުއްވި ފިޔަވަޅު ތަކަކީ ކޮބައިތޯ ބެލުމަށް ޓަކައި ވެސް މެމްބަރު ވަނީ ސުވާލު ކުރައްވާފަ އެވެ.

މި ސުވާލަށް ޖަވާބު ދެއްވަމުން މިނިސްޓަރު އިހުސާން ވިދާޅުވީ މިއަދާއި ހަމައަށް ދައުލަތުގެ އެއްވެސް އިދާރާއަކުން އެފަދަ ކަމެއް ފާހަގަކޮށްފައި ނުވާ ކަމަށާއި ނަމަވެސް އެފަދަ ކަމެއް މުއައްސަސާ އަކުން އަންގާ ހިސާބުން އިސްތިސްނާއެއް ނެތި މުވައްޒަފުންނަށް ފިޔަވަޅު އަޅާނެ ކަމަށެވެ.