ކިލޯއެއްހާ ޑުރަގާ އެކު ހުޅުމާލެއިން ދެ މީހަކު ހައްޔަރުކޮށްފި

ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހުޅުމާލެ ދެވަނަ ފޭހުގައި ހިންގި މަސްތުވާތަކެތީގެ އޮޕަރޭޝަނެއްގައި ދެ މީހަކު ހައްޔަރުކޮށްފި އެވެ.

މި އޮޕަރޭޝަނުގައި ހައްޔަރުކޮށްފައިވަނީ ހދ. ނޭކުރެންދޫ ސާޒް، އިބްރާހީމް ރިސްފާން، 25، އާއި މ. ވިލާތުކުންނާރުގެއާގެ، މުޙައްމަދު ޒައީން، 36، އެވެ.

މި މަހުގެ 19 ވަނަ ދުވަހު މި އޮޕަރޭޝަން ހިންގާފައި ވަނީ ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެންނެވެ.

މި އޮޕަރޭޝަނުގައި، ހުޅުމާލެ ދެ ވަނަ ފޭހުގެ ތިން ޓަވަރެއްގެ ތިން އެޕާޓްމަންޓަކާއި، ދެ ކާރު އަދި ދެ ސައިކަލު ބަލައި ފާސްކޮށްފައިވެ އެވެ.

ފާސްކުރުމުގެ ތެރެއިން ފެނިފައިވާ މަސްތުވާތަކެތީގެ ވަގުތީ ބަރުދަނަކީ 968.6 ގުރާމެވެ.

އެމީހުންގެ އަތުން ފެނިފައި ވަނީ ކޮން ބާވަތެއްގެ މަސްތުވާ އެއްޗެއްކަން ފުލުުހުން ހާމައެއް ނުކުރެ އެވެ.

މި މައްސަލައާ ގުޅިގެން ހައްޔަރު ކުރި ދެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ދެ މީހުން ވެސް ފަސް ދުވަހަށް ބަންދު ކުރުމަށް އަމުރުކޮށްފައިވެ އެވެ.

މި މައްސަލަ ފުލުހުންގެ އަންނަނީ އިތުރަށް ތަހުގީގު ކުރަމުންނެވެ.