އަންނަ ހަފުތާގައި އިމާމުވެ ހުކުރު ނަމާދު ކުރައްވާނީ މަސްޖިދުއްނަބަވީގެ އިމާމު

އަންނަ ހުކުރު ދުވަހު މާލޭގެ އިސްލާމީ މަރުކަޒުގައި އިމާމުވެ، ހުކުރު ނަމާދު ކުރައްވާނީ މަސްޖިދުއްނަބަވީގެ އިމާމު ޑރ. ސަލާހުލްބުދައިރު، ކަމަށް އިސްލާމިކް މިނިސްޓްރީން ބުނެފި އެވެ.

ރަސްމީ ދަތުރުފުޅެއްގައި ޑރ. ސަލާހުބުދައިރު ރާއްޖެއަށް ވަޑައިގަންނަވާނީ މާދަމާ އެވެ.

ޑރ. ސަލާހުލްބުދައިރު، މިމަހުގެ 23 ވާ ބުދަ ދުވަހު ސަލްމާން ރަސްގެފާނު މިސްކިތުގައި އިމާމުވެ މަގުރިބު ނަމާދާއި އިޝާ ނަމާދު ކުރެއްވުމަށް ވަނީ ހަމަޖެހިފަ އެވެ. އަދި  24 ވަނަ ދުވަހު އިސްލާމީ މަރުކަޒުގައި އިމާމުވެ އިޝާ ނަމާދު ކުރައްވާނެ އެވެ.

މީގެ އިތުރުން ޑރ. ސަލާހުލްބުދައިރު ދެއްވާ ހާއްސަ ދަރުހެއް 24 ވަނަ ދުވަހުގެ ރޭ 20:15 ގައި އިސްލާމީ މަރުކަޒުގައި އޮންނާނެ އެވެ.

މި ދަރުސްގެ ތަރުޖަމާ ދެއްވުމަށް ހަމަޖެހިފައިވަނީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު އެވެ.

އިސްލާމިކް މިނިސްޓްރީން ބުނީ މި މަހުގެ 25 ވާ ހުކުރު ދުވަހު އިސްލާމީ މަރުކަޒުގައި އިމާމުވެ ހުކުރު ނަމާދު ކުރައްވަން ހަމަޖެހިފައި ވަނީ ޑރ. ސަލާހުލްބުދައިރު ކަމަށެވެ.

އިމާމުގެ މި ދަތުރުފުޅުގައި އެ މަނިކުފާނު ރައީސް ޑރ. މުޙައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވާ ގޮތަށް ވަނީ ހަމަޖެހިފަ އެވެ.

އެ މަނިކުފާނުގެ މިދަތުރުފުޅަކީ 40 އަހަރުގެ ތެރޭގައި ދެ ހަރަމްފުޅުގެ އިމާމުންގެ ތެރެއިން އިމާމެއް ރާއްޖެ ވަޑައިގަންނަވާ ފުރަތަމަ ފަހަރުކަން ފާހަގަކޮށްލެވެ އެވެ.