ހަރަމްފުޅުގެ އިމާމު، ރާއްޖެ ވަޑައިގަންނަވާނީ އަންނަ ހޯމަ ދުވަހު

މަދީނާގެ މުގައްދަސް ހަރަމްފުޅު އަލްމަސްޖިދުއްނަބަވީގެ އިމާމު، ޑރ. ސަލާހުލްބުދައިރު ރާއްޖެއަށް ވަޑައިގަންނަވާނީ އަންނަ ހޯމަ ދުވަހު ކަމަށް އިސްލާމިކް މިނިސްޓްރީން ހާމަކޮށްފި އެވެ.

އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ކުރެއްވި އެކްސް ޕޯސްޓެއްގައި ވިދާޅުވީ ހަރަމްފުޅު އިމާމު، ރަސްމީ ދަތުރުފުޅެއްގައި ރާއްޖެ ވަޑައިގަންނަވާނީ މި މަހުގެ 21 ވާ ހޯމަ ދުވަހު ކަމަށެވެ.

ޝަހީމް ވިދާޅުވީ މި ދަތުރުފުޅުގައި އިމާމުވެ، ނަމާދު ކުރާ ޒުވާން ހާފިޒުންނާއި އިމާމުންނާއި އިލްމުވެރީންގެ އިތުރުން ޒުވާން ހަތީބުންނާ ވެސް ހަރަމްފުޅުގެ އިމާމު ބައްދަލު ކުރައްވާނެ ކަމަށެވެ.

އޭގެ އިތުރުން ޕްރީ ސުކޫލް ތަކުގެ ދަރިވަރުންނަށް އިމާމު ސަލާމްކުރަން ދައުވަތު އަރުވާނެ ކަމަށާއި އަދި ގުރުއާން ހިތު ދަސްކުރާ ޒުވާނުންނާ ވެސް އެ މަނިކުފާނު ބައްދަލު ކުރައްވާނެ ކަމަށް މިނިސްޓަރު ޝަހީމް ވިދާޅުވި އެވެ.

މިއީ 40 އަހަރު ފަހުން ހަރަމްފުޅެއްގެ އިމާމަކު ރާއްޖެވަޑައިގަންނަވާ ފުރަތަމަ ފަހަރެވެ.

ހަރަމްފުޅެއްގެ އިމާމަކު މީގެ ކުރިން ރާއްޖެއަށް ވަޑައިގެންނެވީ އިސްލާމީ މަރުކަޒު ހުޅުވުމުގެ ރަސްމިއްޔާތަށެވެ. އެ ފަހަރު ވަޑައިގެންނެވީ މައްކާގެ ހަރަމްފުޅުގެ އިމާމު ފަޟީލަތުއްޝައިހު މުޙައަމަދު އައްސުބައްޔިލެވެ.

އިސްލާމިކް މިނިސްޓްރީން ބުނީ އިމާމުގެ މި ދަތުރުފުޅުގައި އިސްލާމީ މަރުކަޒުގައި ހުކުރު ހުތުބާ ދެއްވުމުގެ އިތުރުން އާއްމު ރައްޔިތުންނަށް ދީނީ ދަރުހެއް ދެއްވުމާއި ސަލްމާން މިސްކިތަށާއި އިސްލާމީ މުއައްސަސާ ތަކަށް ޒިޔާރަތް ކުރައްވާނެ ކަމަށެވެ.

އަދި ރައީސުލްޖުމުހޫރިއްޔާ ޑރ މުޙައްމަދު މުއިއްޒުގެ އަރިހަށް އިހުތިރާމްގެ ޒިޔާރަތެއް ކުރައްވާ ގޮތަށް ހަމަޖެހިފައިވާ ކަމަށް ވެސް މިނިސްޓްރީން ބުނެ އެވެ.