މަސްވެރި ދޯނިތަކުގެ 95 އިންސައްތަ މިހާތަނަށް ދަފުތަރުވެފައިވޭ: ރައީސް

ޕޮޑްކާސްޓުގެ ހަތަރު ވަނަ އެޕިސޯޑުގައި ރައީސް މުއިއްޒު ވާހަކަފުޅު ދައްކަވަނީ — ފޮޓޯ/ ރައީސް އޮފީސް

މަސްވެރި ދޯނިތަކުގެ 95 އިންސައްތަ މިހާތަނަށް ދަފުތަރުވެފައިވާ ކަމަށް ރައީސުލްޖުމުހޫރިއްޔާ ޑރ. މުއިއްޒު ވިދާޅުވެއްޖެ އެވެ.

"ރައްޔިތުންނާ އެކު" ސިލްސިލާ ޕޮޑްކާސްޓްގެ ހަތަރު ވަނަ އެޕިސޯޑްގައި ވާހަކަފުޅު ދައްކަވަމުން ވަކި ވަކި މަސްވެރީން ދަފުތަރު ކުރެވެމުންދިޔުމުން، މަސްވެރި ކަމަކީ ދެމެހެއްޓެނިވި އާމްދަނީ ލިބޭ ކަމެއްގެ ގޮތުގައި ބޭންކު ތަކުން ބަލައި ގަންނާނޭ ކަން ރައީސް ފާހަގަ ކުރެއްވި އެވެ.

ދަފުތަރެއް އެކުލަވާލައި ދަފުތަރު ކުރުމުގެ މަސައްކަތް ފަށައިގަތީ ސަރުކާރުގެ ފުރަތަމަ 14 ހަފްތާ ތެރޭގަ އެވެ.

މަސްވެރި ކަމަށް ބޭނުންވާ ކަނދުފައްޗަށް އިޝާރާތް ކުރައްވަމުން ރައީސް ވިދާޅުވީ، މި ދައުރުގެ މިހާތަނަށް 18 ވަދު ކަނދުފަތި ގާއިމު ކުރެވިފައިވާ ކަމަށާއި، ކަނޑައިގެންދިޔަ، 21 ކަނދުފަތި ވެސް އަލުން ގާއިމު ކުރެވިފައިވާ ކަމަށެވެ. އަދި މަސްވެރީންގެ ރައްކާތެރި ކަމަށް ޓަކައި، ރެސްކިއު ޑައިވިން ކޯސްތައް ހިންގައި، 56 ދޯންޏަކުން 56 ރެސްކިއު ޑައިވަރުން ތަމްރީނު ކުރެވިފައިވާ ކަމަށް ވެސް އެ މަނިކުފާނު ވިދާޅުވި އެވެ.

މަސްވެރި ކަމުގެ ދާއިރާއިން މީހުން ބިނާ ކުރުމުގެ ގޮތުން، ގައުމީ ޔުނިވާސިޓީގެ މޯލްޑިވްސް ކޮލެޖް ފޯ ފިޝަރީޒް އެންޑް އޯޝަން ސައިންސަސް އިން 45 ދަރިވަރަކަށް ބެޗެލާސް އޮފް ފިޝަރީޒް މެނޭޖުމެންޓް ކިޔެވުމަށް ފުލް ސްކޮލާޝިޕްގެ ފުރުސަތު ދެއްވަމުން ގެންދަވާނޭ ކަމުގައި އެ މަނިކުފާނު ވިދާޅުވި އެވެ.

އޭގެ އިތުރުން މަސްވެރިކަމާ ގުޅުންހުރި އެހެނިހެން ދާއިރާ ތަކުން ވެސް ތައުލީމާއި ތަމްރީނުގެ ފުރުސަތުތައް ފަހިކޮށް ދެއްވާނޭ ކަމުގައި ރައީސް މުއިއްޒު ވިދާޅުވި އެވެ.

ރައީސް ޑރ މުޢިއްޒު