ގައުމީ އިނާމަށް ނަން ހުށަހެޅުމުގެ ފުރުސަތު ހުޅުވައިލަނީ

އަހުމަދު މުހައްމަދު (ދޮނާ) އަށް ރައީސް މުއިއްޒު ޝަރަފްވެރިކަމުގެ ގައުމީ އިނާމު ދެއްވަނީ. -- ފޮޓޯ: ރައީސް އޮފީސް

ގައުމީ އިނާމަށް ނަން ހުށަހެޅުމުގެ ފުރުސަތު، މިމަހުގެ 20 ވާ އާދީއްތަ ދުވަހު ހުޅުވާލުމަށް ގައުމީ އިނާމާބެހޭ ކޮމިޓީން ހަމަޖައްސައިފި އެވެ.

މި އިނާމަށް އެދި ފޯމު ހުށަހެޅުމަށް ހަމަޖެހިފައި ވަނީ، އެ ދުވަހުން ފަށައިގެން އަންނަ މޭ މަހުގެ 29 ވާ ބުރާސްފަތި ދުވަހުގެ ނިޔަލަށެވެ.

ފޯމު ފޮނުވަން ޖެހެނީ، ގައުމީ އިނާމާބެހޭ ކޮމިޓީއަށް އެޑްރެސްކޮށް، ރައީސުލްޖުމްހޫރިއްޔާގެ އޮފީހަށެވެ.

އިނާމަށް އެދި ފޯމު ހުށަހަޅާއިރު، ފޯމާ އެކުގައި ހުށަހަޅާން ޖެހޭ ލިޔުންތައް ފޮނުވުމަށް ހާއްސަ ސަމާލު ކަމެއް ދިނުމަށް ގައުމީ އިނާމާބެހޭ ކޮމިޓީން އެދިފައިވެ އެވެ.

ގައުމީ އިނާމަށް މި އަހަރު ހުޅުވައިލުމަށް ނިންމަވައިފައި ވަނީ، މައިގަނޑު 39 ދާއިރާ އަކުންނެވެ.

ކުރީ އަހަރުތަކެކޭ އެއްގޮތަށް، މި އަހަރުވެސް ގައުމީ އިނާމަށް އެދޭ އަމިއްލަ ފަރާތް ތަކުންނާއި، ގައުމީ އިނާމަށް އެހެން ފަރާތެއްގެ ނަން ހުށަހަޅަން ބޭނުންވާ ފަރާތް ތަކުންނާއި، ކުންފުނި، ޖަމުއިއްޔާ ޖަމާއަތް ފަދަ ތަންތަނުން ސަރުކާރުގެ އިދާރާއެއް މެދުވެރިނުކޮށް، ނަން ހުށަހެޅޭ ގޮތަށް ވަނީ ހަމަޖައްސަާފަ އެވެ.

އޭގެ އިތުރުން ސަރުކާރުގެ އިދާރާ ތަކުންނާއި، މިނިވަން މުއައްސަސާ ތަކުން ވެސް ގައުމީ އިނާމަށް ނަން ހުށަހެޅޭ ގޮތަށް ވަނީ ހަމަޖައްސާފަ އެވެ.

ގައުމީ އިނާމާބެހޭ ކޮމެޓީ