ޑިސެމްބަރުން ފެށިގެން މިހާތަނަށް މަސްވެރީންނަށް 470 މިލިއަށް ރުފިޔާ ދީ ނިންމައިފިން: ރައީސް

މިދިޔަ އަހަރުގެ މަސްވެރީންގެ ދުވަހުން ފަށައިގެން މިއަދާ ހަމައަށް، އެންމެ ދުވަހެއްވެސް ވައްޓާ ނުލައި މަސްވެރީންނަށް ފައިސާ ދެވެމުންދާ ކަމަށާއި، މި މުއްދަތުގެ ތެރޭގައި 470 މިލިޔަން ރުފިޔާ މަސްވެރީންނަށް ދޫ ކުރައްވާފައިވާނޭ ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެ އެވެ.

"ރައްޔިތުންނާ އެކު" ޕޮޑްކާސްޓުގެ ހަތަރު ވަނަ އެޕިސޯޑުގައި ރައީސް މުއިއްޒު ދެއްކެވި ވާހަކަފުޅުގައި ވަނީ އެ މަނިކުފާނުގެ ވައުދުފުޅާ އެއްގޮތަށް، 48 ގަޑިއިރު ތެރޭ ފައިސާ ދެވޭ ގޮތަށް ކުރެއްވި އިންތިޒާމުގެ ނަތީޖާއެއްގެ ގޮތުން، ކުރީގައި ދޯނިން ފޭބި ޒުވާނުން އަލުން މަސްވެރިކަމާ ގުޅިފައިވާކަން އުފަލާއެކު ފާހަގަކުރާފަ އެވެ.

ގަވާއިދުން ފައިސާ ލިބޭނޭ ކަމުގެ އިތުބާރު ޒުވާނުންނަށް ލިބުމުން، ދިވެހި މަސްދޯނި ތަކުގައި މަސައްކަތް ކުރަނީ ދިވެހީން ކަމުގައި ހެދުމަށް ހިއްޕަވާފައިވާ އަމާޒަށް ވާސިލުވުމުގެ މަގު ވެސް ތަނަވަސް ވެގެން ދާނޭކަ ކަމަށް އެ މަނިކުފާނު ވިދާޅުވި އެވެ.

އޭގެ އިތުރުން މަސްވެރީންނަށް މާލީ ބާރުވެރިކަން ކަށަވަރު ކޮށްދިނުމަށް ޓަކައި އުފެއްދެވި، މަސްވެރީންގެ ދަފުތަރުގައި މަސްވެރި ދޯނިތަކުގެ 95 އިންސައްތަ މިހާތަނަށް ދަފުތަރުވެފައިވާ ކަމަށް ވެސް އެ މަނިކުފާނު ވިދާޅުވި އެވެ.

އަދި ވަކި ވަކި މަސްވެރީން ދަފުތަރު ކުރެވެމުންދިޔުމުން، މަސްވެރި ކަމަކީ ދެމެހެއްޓެނިވި އާމްދަނީ ލިބޭ ކަމެއްގެ ގޮތުގައި ބޭންކު ތަކުން ބަލައިގަންނާނޭ ކަން ވެސް އެ މަނިކުފާނު ފާހަގަ ކުރެއްވި އެވެ.

މަސްވެރި ކަމަށް ބޭނުންވާ ކަނދުފައްޗަށް އިޝާރާތް ކުރައްވަމުން އެ މަނިކުފާނު ވިދާޅުވީ، މި ދައުރުގެ މިހާތަނަށް 18 ވަދު ކަނދުފަތި ގާއިމު ކުރެވިފައިވާ ކަމަށާއި ކަނޑައިގެންދިޔަ، 21 ކަނދުފަތި ވެސް އަލުން ގާއިމު ކުރެވިފައިވާ ކަމަށެވެ. އަދި މަސްވެރީންގެ ރައްކާތެރި ކަމަށް ޓަކައި، ރެސްކިއު ޑައިވިން ކޯސްތައް ހިންގައި، 56 ދޯންޏަކުން 56 ރެސްކިއު ޑައިވަރުން ތަމްރީނު ކުރެވިފައިވާ ކަމަށް ވެސް އެ މަނިކުފާނު ވިދާޅުވި އެވެ.

މަސްވެރިކަމުގެ ދާއިރާއިން މީހުން ބިނާ ކުރުމުގެ ގޮތުން، ގައުމީ ޔުނިވާސިޓީގެ މޯލްޑިވްސް ކޮލެޖް ފޯ ފިޝަރީޒް އެންޑް އޯޝަން ސައިންސަސް އިން 45 ދަރިވަރަކަށް ބެޗެލާސް އޮފް ފިޝަރީޒް މެނޭޖްމަންޓް ކިޔެވުމަށް ފުލް ސްކޮލާޝިޕްގެ ފުރުސަތު ދެއްވަމުން ގެންދަވާނޭ ކަމުގައި އެ މަނިކުފާނު ވިދާޅުވިއެވެ. އަދި މަސްވެރިކަމާ ގުޅުން ހުރި އެހެނިހެން ދާއިރާ ތަކުން ވެސް ތައުލީމާއި ތަމްރީނުގެ ފުރުސަތުތައް ފަހިކޮށްދެއްވާނޭ ކަމުގެ ޔަގީންކަން ރައީސް ދެއްވި އެވެ.