އަޟްހާ ޢީދަށް މުޅި ރާއްޖޭގެ ދިއްލާލުމަށް ތައްޔާރުވެއްޖެއެވެ. "ޢީދު އަލި" ހަރަކާތް ކުރިއަށްގެންދިއުމަށް ރާއްޖޭގެ އެކި ކަންކޮޅުތަކުގައި ލައިޓުތައް ހަރުކުރުމުގެ މަސައްކަތް ފޯރިއާއެކު ދަނީ ކުރިއަށެވެ.

އިސްލާމީ ޤައުމުތަކުގައި ޢީދު ފާހަގަކުރުމުގައި ގެންގުޅޭ ސަޤާފަތެއްގެގޮތުން ރާއްޖޭގައިވެސް "ޢީދު އަލި" ހަރަކާތް ކުރިއަށްގެންދަން ސަރުކާރުން ނިންމާއި، ފުރަތަމަ ދިއްލާލީ މިދިޔަ ފިޠުރު ޢީދުގައެވެ. މި ކަމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އިސްނެގުމަށް ފެއްޓެވި ކަމެކެވެ.

އަޟްހާ ޢީދަށް މުޅި ރާއްޖެ ދިއްލާލުމަށް ކުރިއަށްގެންދާ ހަރަކާތުގެ ދަށުން ހުރިހާ ސިޓީތަކާ އަދި އަތޮޅުވެރިކަން ކުރާ ރަށްތަށް ދިއްލާލުން ކުރިއަށްދާނެއެވެ. މި ރަށްތަކުގައި ލައިޓް ހަރުކޮށް، ދިއްލުމަށް މިހާރު ދަނީ ފަހުގެ ތައްޔާރީތައްވަމުންނެވެ. ލައިޓްތައް ފަރުމާކޮށްފައިވަނީ އިސްލާމީވަންތަކަން ދައްކުވައިދޭ ފަރުމާތަކާއި، މާ ބަގީޗާތައް ރަމްޒުކޮށްދޭގޮތަށެވެ. ރީތި ކުލަތަކުން ގިޑިގެތަކާއި، މާ ބަގީޗާ ޕާކްތައް ހިމެނޭގޮތަށް މާލެއާއި ރަށްރަށުގެ ބޮޑެތި މަގުތަކާއި، އާއްމުން ގިނައިން އެއްވެ އުޅޭ ތަންތަނުގައި އެ ލައިޓްތައް ހަރުކުރުމުގެ މަސައްކަތްދަނީ ކުރަމުންނެވެ.

ލައިޓްތައް ހަރުކޮށް ދިއްލުމުގެ މަސައްކަތް ކުރިއަށްގެންދަނީ ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާއި ބެހޭ ވުޒާރާ، އެޗްޑީސީ، ސްޓެލްކޯ އަދި ފެނަކަ ކޯޕަރޭޝަން ގުޅިގެންނެވެ.

"ޢީދު އަލި" ހަރަކާތަކީ ނިމުނު ފިޠުރު ޢީދުގައިވެސް އާއްމުންގެ އެންމެ ބޮޑު ޝަޢުގުވެރިކަމެއް ލިބުނު ހަރަކާތެކެވެ.އެ ހަރަކާތް މުޅި ރާއްޖޭގައި އިފްތިތާޙުކުރެއްވީ، ޖުމްހޫރީ މައިދާނުގައި ބޭއްވި ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުއެވެ. މިއީ ކުޑަކުދިންގެވެސް ވަރަށް ބޮޑު ޝަޢުވެރިކަމެއް ލިބުނު ކަމެކެވެ.

ޢީދަށް މުޅި ރާއްޖެ ދިއްލާލުމުގެ ހަރަކާތް އޮންނާނީ ޢީދު ވިލޭރެއެވެ. އަދި ޢީދު ނިމެންދެން ލައިޓްތައް ޖަހާފައި ހުންނާނެއެވެ. ސަރުކާރުކާރުގެ ޢަމާޒަކީ ކުރިއަށް އޮތް އަހަރުތަކުގައި މި ހަރަކާތް ރާއްޖޭގެ ހުރިހާ ރަށެއްގައި ހިންގުމެވެ.