ތުރުކީގައި ރާއްޖޭގެ އެމްބަސީއެއް ހުޅުވައިފި

ތުރުކީގައި ރާއްޖޭގެ އެމްބަސީ ހުޅުވުމަށް ބޭއްވި ރަސްމިއްޔާތުގެ ތެރެއިން --

ތުރުކީގައި ފުރަތަމަ ފަހަރަށް ރާއްޖޭގެ އެމްބަސީއެއް ހުޅުވައިފި އެވެ.

އިއްޔެ، މި އެމްބަސީ ރަސްމީކޮށް ހުޅުވައިދެއްވީ އެ ކަމަށް ޓަކައި ބޭއްވި ދިދަ ނެގުމުގެ ހާއްސަ ރަސްމިއްޔާތެއްގައި ފޮރިން މިނިސްޓަރު ޑރ. އަބްދުﷲ ހަލީލް އެވެ. އެމްބަސީ ހުޅުވައިފައި ވަނީ ތުރުކީގެ ވެރިރަށް، އަންކާރާގަ އެވެ.

އެމްބަސީ ހުޅުވުމުގެ ރަސްމިއްޔާތުގައި ތުރުކީގެ މިނިސްޓާ އޮފް ކަލްޗާ އެންޑް ޓޫރިޒަމް މެހްމެތު ނޫރީ އެރްސޮއި އަދި ރާއްޖެއިން ތުރުކީ އަށް ކަނޑައަޅާފައިވާ ސަފީރު ލެފްޓެނަންޓް ޖެނެރަލް (ރޓ) އަބްދުއްރަހީމް އަބްދުއްލަތީފް ވެސް ބައިވެރިވެ ވަޑައިގެންނެވި އެވެ.

ފޮރިން މިނިސްޓްރީން ބުނީ ތުރުކީގައި ރާއްޖޭގެ އެމްބަސީއެއް ހުޅުވުމަކީ ދެ ގައުމުގެ ގުޅުން އިތުރަށް ބަދަހި ކުރުމަށް އެޅުނު މުހިއްމު ފިޔަވަޅެއް ކަމަށެވެ. އަދި މި އެމްބަސީގެ ސަބަބުން ދެ ގައުމުގެ އިގުތިސާދާއި ފަތުރުވެރިކަމާއި، ސަގާފަތް ކުރިއަރުވާ ތައުލީމީ ދާއިރާގެ ގުޅުންތައް ވެސް އިތުރަށް ވަރުގަދަ ވާނެ ކަމަށެވެ.

ފޮރިން މިނިސްޓަރު ހަލީލުގެ ވާހަކަފުޅުގައި ވިދާޅުވީ މި އެމްބަސީއާއެކު، އެ ގައުމަށް ޒިޔާރަތް ކުރާ ދިވެހިންނާއި ތުރުކީގައި ދިރިއުޅެމުން އަންނަ ދިވެހީންނަށް ދިމާވާ ކަން ކަމުގައި އެހީތެރިކަން ފޯރުކޮށްދިނުމަށް ލުއިފަސޭހަ ވާނެ ކަމަށެވެ. އޭގެ އިތުރުން މިއީ ތުރުކީއާއެކު އޮތް ގުޅުން އިތުރަށް ބަދަހިވަމުންދާ ކަމުގެ އަލިގަދަ ހެއްކެއް ކަން ވެސް މިނިސްޓަރު ހަލީލް ފާހަގަ ކުރެއްވި އެވެ.

ތުރުކީ ވިލާތް